اسرایل وايي په لبنان کې د حزب الله دوه کمانډران يې وژلي
واشنګټن (وي او ای/ای پي/ای اېف پي/روېټرز) ـ د اسرایل پوځ د زیارت، پنجشنبې، په ورځ وویل په لبنان کې يې د حزب الله دوه هغه کمانډران ووژل چې په شمالي اسرایل د مزایلو په حملو کې ککړ وو.
د اسرایل ډيفېنس فورسز، ايي ډي اېف، د حزب الله د وژل شویو کمانډرانو شناخت د احمد مصطفا الجاج علي او د محمد همدان په نومو وکړو.
ايي ډي اېف د زیارت، پنجشنبې، په ورځ دا هم وویل په اسرایل د لبنان نه د ۴۰ راکټونو حمله شوې ده خو د اسرایل دفاعي نظام د زیارتو راکټونو لاره ونیوله.
د امریکې صدر جوبایډن د شورو، چهارشنبې، په ورځ د اسرایلي وزیراعظم بېنجمن نېټن یاهو سره په ټېلې فون خبرې وکړې او دا خبره يې تکرار کړه چې اسرایل سره د امریکې ملاتړ په "فولادو کې د نغښتی" دی.
د اګست د ۲۱ نېټې راهسې دا په ټېلې فون د بایډن او نېټن یاهو وړمبۍ خبرې اترې وې چې نایب صدر کاملا هېرېس هم په کې شامله وه.
د بایډن او د نېټن یاهو د خبرو په اړه وایټ هاوس په رسمي بیان کې وویل دواړو مشرانو په دې خبره ټینګار وکړو چې د حماس د ولکي نه د یرغمالانو د ازادولو او د جنګ بشري تاوان کمولو دپاره پکار ده چې سفارتي کوښښونه په بېړنۍ توګه شروع کړی شي.
د اسرایل دفاع وزیر وایي ایران ته به یې جواب "مرګونی، کره او حیرانوونکی" وي
د اسرایل د دفاع وزیر یوواو ګېلنټ د چارشنبې- شورو په ورځ خبرداری ورکړ چې پر اسرایل د ایران د بېلسټیک میزایلو بریدونو ته به یې جواب "مرګونی، کره او "حیرانوونکی" وي.
یوواو ګېلنټ د خپل هېواد له استخباراتي څانګې سره د اکتوبر پر نهمه په خبرو کې ویلي، د اسرایل بریدونه به "ډېر په ناپ تللي" وي او ایران به په دې پوه هم نه شي چې څه وشول او څنګه وشول.
د صدر بایډن او وزیراعظم نتنیاهو له ټیلیفوني خبرو وروسته د اسرایل د دفاع وزارت یوه ویډیو خپره کړې چې رویټرز هم پر خپل یوټیوپ ورکړې پکې هغه د اسرایل د استخباراتو پوځي افسرانو ته وایي:
"څوک چې پر موږ برید کوي زیان به یې ویني او قیمت به یې ادا کوي. زموږ برید به وژونکی ، کره او تر هر څه بالاتر حیرانوونکی وي، دوی به پوه هم نه شي چې څه وشول او څنګه وشول، دوی به یې نتیجې وویني".
ټاکل شوې وه چې د اسرایل د دفاع وزیر د ا کتوبر پر نهمه واشنګټن ته سفر وکړي، خو پېنټاګان وویل هغه خپل سفر ځنډولی خو په دې اړه یې له تبصرې ډډه وکړه چې هغه ولې خپل سفر ځنډولی دی.
بل لور ته د اسرایل رسنیو خبر ورکړی چې وزیراعظم بنیامین نتنیاهو غوښتل اول د چارشنبې- شورو د امریکې له صدر جوبایډن سره خبرې وکړي.
واشنګټن ته د اسرایل د دفاع وزیر سفر په داسې وخت ځنډېدلی چې د اسرایل او ایران تر منځ کړکېچ زیات شوی او دواړه هېوادونو په لبنان کې د حزب الله پر مشرانو د بریدونو پر سر یو بل ته ګواښونه کوي.
صدر بایډن د اسرایلي وزیراعظم سره په ټېلې فون خبرې وکړې
واشنګټن (وي او ای/ ای پي/ای اېف پي/روېټرز) ـ د امریکې صدر جوبایډن د شورو، چهارشنبې، په ورځ د اسرایل وزیراعظم بېنجمن نېټن یاهو سره په ټېلې فون په داسې حال کې خبرې وکړې چې اسرایلي ځواکونه په لبنان او غزه کې عملیات کوي او د ایران د مزایلو حملې ته جواب په ورکولو غور کوي.
د اګست د ۲۱ نېټې نه وروسته دا وړمبی ځل و چې بایډن او نېټن یاهو په ټېلې فون خبرې وکړې. نایب صدره کاملا هېرېس هم په خبرو کې شامله وه.
د اکتوبر په وړمبۍ نېټه په اسرایل د ایران د بېلېسټېک حملو وروسته، نېټن یاهو ویلي ایران غلطي کړې او د حملې قيمت په ادا کوي.
بایډن ویلي د ایران په اېټمي مرکزونو د اسرایل د حملې حمایت نه کوي.
بلخوا، اسرایلي ځواکونو په غزه او لبنان کې د حماس او د حزب الله خلاف حملې جاري وساتلې او د فلسطيني چارواکو د شورو، چهارشنبې، په ورځ وویل تېره شپه په غزه کې د اسرایل په حملو کې ۱۸ کسان وژل شوي دي.
فلسطيني چارواکي وايي د اسرایل په بمبارۍ کې ۱۸ کسان وژل شوي دي
واشنګټن (وي او ای/ای پي/ای اېف پي/روېټرز) ـ فلسطیني چارواکو د شورو، چهارشنبې، په ورځ وویل د غزه په مرکزي او شمالي برخو کې تېره شپه د اسرایل په حملو کې ۱۸ کسان وژل شوي دي.
په حملو کې د غزه په جنوب کې د کډوالو النصیرت او برېج کېمپونه او په شمال کې جبلیه کېمپ ویشتل شوی دی.
د اسرایل پوځ د شورو، چهارشنبې، په ورځ وویل په غزه کې يې د حماس په وسله والو هوايي او ځمکنۍ حملې کړي دي.
ملګرو ملتونو وویل د جګړې او د اسرایل د انخلا احکاماتو د ملکی فلسطینیانو دپاره څه ځای نه دی پرېښودی چې ورشي.
د فلسطيني کډوالو دپاره د ملګرو ملتونو څانګې یواېن ار ډبلیو ای، مشر فېلېپ لزاریني په اېکس یو پېغام کې وویل لږ تر لږه ۴۰۰۰۰۰ فلسطینیان د غزه په شمال کې ګېر دي. هغه وویل ډېر خلک د انخلا دپاره د اسرایل احکامات د منلو نه انکار کوي ځکه چې ورته معلومه ده چې په غزه کې هېڅ ځای محفوظ نه دی.
بلخوا، اسرایلي ځواکونو د شورو، چهارشنبې، په ورځ په جنوبي لبنان کې د حزب الله وسله والې ډلې خلاف حملې وکړې. اسرایلي پوځ وویل د نهې، سه شنبې، او د شورو، چهارشنبې، په ورځ جګړه کې يې درې عسکر زخمیان شول.