د اسرایل او د حماس د جګړې په اړه خبرو دپاره د امریکې خارجه وزیر ترکي ته رسېدلی
واشنګټڼ (وي او ای/روېټرز/ای پي/ای اېف پي) د اسرایل او حماس جنګ د خپرېدو مخنیوي او غزه ته د انساني امداد د زیاتېدو په اړه د خبرو دپاره د امریکې خارجه وزیر اېنټني بلېنکن منځني ختیځ ته د سفر په وړمبي پړاو د جمعې په ورځ ترکي ته ورسېدو.
بلېنکن به د خالي، شنبې، په ورځ د ترکي صدر رجپ طیب اردوان سره ملاقات کوي.
سټېټ ډپارټمنټ یا د امریکې خارجه وزارت وویل بلېنکن به دا غوښتنې تکراروي چې غزه ته دې بشري امداد زیات کړی شي.
منځني ختیځ ته د بلېنکن د وروستي سفر هدف دا دی چې د اسرایل او حماس جنګ لبنان او وېسټ بېنک ته خپور نه شي په سور سمندر کې دې د تجارتي سمندي جهازونو لارې خلاصې وساتل شي.
په اووم اکتوبر په اسرایل د حماس د حملې او د دې په جواب کې د حماس خلاف داسرایل جنګ د شروع کېدو راهسې منځني ختیځ ته دا د بلېنکن څلورم سفر دی.
د ترکې ته پس به بلېنکن اسرایل، وېسټ بېنک، یونان، اردن، قطر، متحده عرب اماراتو، سعودي عرب او مصر ته هم ورځي.
بلېنکن منځني ختیځ ته سفر په داسې حال کې کوي چې د انساني امداد او د بيړني حالاتو دپاره د ملګرو ملتونو د مشر رابطه کار مارټن ګرفېتس د جمعې په ورځ په یو بیان کې وویل په تېرو میاشتو کې غزه نه د "مرګ او مایوسۍ" ځای جوړ شوی دی.
حزب الله د خپل کمانډر د وژلو په بدل کې د اسرایل پر پوځي اډه بریدونه کړي
په لبنان کې مېشتې وسلوالې ډلې حزب الله د نهې- سه شنبې په ورځ ویلي، د اسرایل پر یوه پوځي اډه یې ډرون برید کړی دی خو اسرایل وایي په برید کې یې اډاڼو یا چاته کوم ځاني زیان نه دی اوښتی.
حزب الله وایي دغه برید یې د اسرایل د هغو وروستیو هوایي بمبارۍ په بدل کې کړی دی چې لومړی یې د حماس ډلې مرستیال صالح العاروري او وروسته د ګل- دوشنبې په ورځ د دوی یو مهم کمانډر پکې و وژل شول.
حزب الله وایي د ډرون برید مقصد یې د اسرایل او لبنان له پولې شاوخوا لس کیلومیټره لرې په سفید سیمه د اسرایل یو پوځي مرکز په نخښه کول وو.
اسرایلي پوځ وایي دوی په هوا کې د هغو ډرون الوتکو مخه نیولې چې د لبنان له خاورې د اسرایل غاړې ته ور ویشتل شوي وو، خو وایي یو میزایل د اسرایل په شمال کې لګېدلی خو چاته یې مرګ ژوبله نه ده اړولې او نه یې بل څه تاوان کړی دی.
د انصاف نړیوال عدالت د اسرایل خلاف د "نسل وژنې" په تور د مقدمې اورېدنه پیل کړې
د انصاف نړیوال عدالت نن د پنجشنبې- زیارت په ورځ د هغې مقدمې په اړه دوه ورځنۍ اوریدنه پیل کړې ده چې سوېلي افریقا ورته وړاندې کړې ده او په هغه کې په اسرایل باندې په غزه پټۍ کې د نسل وژنې تور لګېدلی دی. اسرایل دا تورونه بې بنیاده بللي دي.
سوېلي افریقا له له نړیوال عدالته غوښتنه کوي چې په غزه کې د اسرایل پوځي عملیات دې په بیړني ډول وځنډول شي، خو اسراییل وايي د اکتوبر د اوومې د ترهګر برید په ځواب کې د حماس ډلې د ختمولو لپاره بریدونه کوي.
د سوېلي افریقا په لیکل شوې مقدمه کې له عدالته غوښتل شوي چې له اسرایل سره د "نسل وژنې" پر سر حساب وکړي او "په غزه کې دې د فلسطینیانو لپاره د بیړني او بشپړ ممکنه تحفظ ضمانت ورکړي چې د نسل وژنې په دوامدار او سمدستي خطر کې پاته دي ".
د اسرایل وزیراعظم بنیامین نتنیاهو ویلي، پوځ یې په غزه کې په "بېساري اخلاقي" بنیاد پوځي عملیات کوي او د اسریل د حکومت ویاند د سوېلي افریقا مقدمه د اسرایلي وګړو "د وینو سپکاوی" بللی دی.
په غزه کې جنګ دلاسه مواصلاتي نظام منقطع شوی دی
واشنګټن (وي او ای/ ای پي/رویټرز/ای اېف پي) په غزه کې د مواصلاتي نظام کمپنۍ پېل ټېل د جمعې په ورځ وویل د جنګ دلاسه په ټوله غزه کې د مواصلاتو نظام قطع شوی و.
پېل ټېل په اېکس، پخواني ټوېټر، په غزه کې د انټرنېټ، موبایل او د ځمکني ټېلې فون نظام د قطع کېدو خبر ورکړو.
اېسوسي اېټېډپرېس خبري اداره وايي په اووم اکتوبر د اسرایل او حماس جنګ د شروع کېدو راهسې په غزه کې اووه ځله د مواصلاتو نظام قطع شوی دی. پېل ټېل په غزه او د اسرایل په قبضه کې وېسټ بېنک ته خدمات ورکوي.
په غزه کې د حماس د انتظام لاندې د صحت وزارت د جمعې به ورځ وویل په تېرو 24 ګنټو کې د اسرایل په هوايي بمبارۍ کې 151 فلسطینیان وژل شوي او 248 زخمیان شوي دي. وزارت په یو بیان کې وویل د جنګ د شروع کېدو راهسې په غزه کې 23708 کسان وژل شوي دي چې په دریو کې دوه برخې په کې ښځې او ماشومان دي.
د اېجنسي فرانس پرېس خبریال خبر ورکړی چې د غزه په جنوب کې د خان یونس او رفح ښارونو ترمنځه سیمه کې حملې او د توپخانې بمباري شوې ده. په دغه سیمو کې د پناه په غرض د تلونکو خلکو ګڼه ګوڼه ده.
د اکتوبر په اوومه نېټه په اسرایل د حماس د حملې په جواب کې اسرایل د حماس خلاف جنګ شروع کړی او اسرایلي چارواکي وايي حماس به ختموي. د حماس په حمله کې په اسرایل کې 1200 کسان وژل شوي دي. حماس تر 250 پورې کسان یرغمال هم نیولي وو چې ځینې ازاد کړی شوي خو ځینې اوس هم یرغمال او څه کسان وژل شوي هم دي.
امریکې، برطانیې، یورپین یونین او ځینو نورو ملکونو حماس ترهګر تنظیم ټاکلی دی.
په جنیوا کې د ملګرو ملتونو د انساني حقونو دفتر، په غزه کې د مرګ ژوبلې شمېرو ته په اشاره، په سمدستي ډول د جنګ بندۍ غوښتنه تکرار کړه. د جنګ 100 ورځې پوره کېدونکي دي.
د یو اېن هیومن رایټس افس ترجماې لېز تروسېل خبریالانو ته وویل "د انساني حقونو او د انساني" خواښوږۍ په بنیاد د جنګ بندۍ غوښتنه کوي. هغې وویل د جنګ بندۍ غوښتنه د خلکو مشکلات او د مرګ ژوبلې د ختمېدو دپاره کوي چې په موثره توګه انساني امداد غزه ته ورسوول شي.
تروسېل په غزه کې د اسرایل پوځي عملیات په پراخه کچه او تباه کوونکي وبلل او داه خبره یې هم وکړه چې فلسطیني مسلح ډلو په اسرایل بې دریغه راکټ حملو ته دوام ورکړی دی.