په ایران کې د یوې اونۍ راهیسې د حکومت پرضد لاریونونه روان دي چې تر اوسه پورې په کې لږ تر لږه ۲۰ لاریون کونکي وژل شوي او په سلګونو نور د امنیتي ځواکونو لخوا نیول شویدي.
پداسې حال کې چې د امنیتي ځواکونو لخوا د لاریون کونکو د ځپلو هڅه کیږي امریکا یوځل بیا د لاریون کونکو څخه خپل ملاتړ څرګند کړی.
د امریکا د ولسمشر مرستیال مایک پېنس وایس اف امریکا سره په یوې مرکه کې ویلي چې ایراني ولس د امریکايي حکومت پوره ملاتړ لري.
(زما امید او زما دعا دا ده چې د ایران خلک پدې پوه شي چې امریکا او امریکايي ولس له دوی سره دي. موږ غواړو چې دوی یو ازاده او دیموکراتیکه راتلونکي ترلاسه کړي.)
په ایران کې د یوې اونۍ راهیسې د روان اړي گړي او لاریونونو د مخنیوي لپاره حکومت د هیواد په ښارونو کې پولیس او امنیتي ځواکونه ځای پرځای کړیدي.
د ایران حکومت ویلي چې د روانو لاریونونو تر شا د بهرنیو لاس دی خو څېړونکي وايي چې د ایران د حکومت دا خبره سمه نه ده.
د پوهنتون یو استاذ هوشنګ امر احمدي وايي:
(په لارو او کوڅو کې مظاهره کونکي بهرنیان نه دي. دوی د ایران عام خلک دی.)
د ایران ولس په حکومتي کچه د شته بډو رشوتونو او اقتصادي بحران پر ضد لاریونونه کوي چې له کبله یې د کلونو راهیسې د بې روزگارۍ کچه لوړه شوې ده او د خلکو د ژوند معیار ټیټ شویدی.
څیړونکو ویلي، د زور له کارولو سره ښايي د یوې مودې لپاره د لاریون کوونکو مخه ونیسي خو د ملایانو حکومت به د دې وړتیا و نه لري چې مخکې هم دوام وکړي.
ښاغلي هوشنګ وړاندې وویل:
(اوس حالات بدل شویدی. په ۴٠ کلونو کې دا لومړې ځل دی چې ایراني ولس د حکومت پرضد یو موټی شویدی. په کال 2009 کې مبارزه د رژیم دننه وه، د دوو ډلو ترمنځ. خو اوس خبره بل ډول ده. اوس ولس د حکومت پرضد راپاسېدلی دی او حکومت باید اوس په ډیر غور سره فکر وکړي چې څه به کوي.)
د امریکا د ولسمشر مرستیال دا هم ویلي، چې د ایران پرضد پاتې اقتصادي بندیزونه گټور ثابت شوي خو له ایران سره د شوي تړون په ترڅ کې د ایران حکومت ته ګټه رسېدلې.
ښاغلي پینس زیاته کړېده، د ټرمپ اداره غواړي پدې تړون کې یو شرط نور هم زیات کړي او هغه دا چې که چېرې ایران بیا د اټومي وسلو د ترلاسه کولو هڅه وکړي نو بیرته پرې باید اقتصادي بندیزونه ولگول شي.
