اسرایلي وزیراعظم وايي پوځ ته یې امر کړی چې ملکي خلک دې د غزه د رفح ښار نه وباسي

د اسرایل وزیراعظم بېنجمن نېټن یاهو د جمعې په ورځ وویل پوځ ته یې امر کړی چې د غزه د جنوبي ښار رفح نه دې ملکي خلک وباسي چېرته چې توقع کېږي اسرایلي ځواکونه ځمکني عملیات پراخول غواړي.

نېټن یاهو په یو بیان کې وویل د حماس د ختمولو د جنګ هدف حاصلول به ممکن نه وي که د حماس څلور بټالینې یا ډلې په رفح کې په خپل ځای بحال پاتې کړی شي.

هغه وویل په رفح کې د حماس فعالیت تقاضا کوي چې ملکي خلک د جنګ د ځای نه وویستل شي.

نېټن یاهو وویل د اسرایل ډېفېنس فورسز، دفاعي ځواکونو، ته یې امر کړی چې کابینې دې رفح نه د ملکي خلکو د انخلا او د حماس ډلې د تباه کولو منصوبه وړاندې کړي.

د نېټن یاهو په بیان کې دا نه دي وېل شوي چې هغه د رفح د انخلا منصوبه کله غواړي او دا چې 1.4 مېلین فلسطینیان په چېرته ځي. د ملګرو ملتونو چارواکو دا خبره په تکرار کړې ده چې په غزه کې هېڅ ځای هم محفوظ نه دی.

نېټن یاهو دا هفته ویلي وو چې خان یونس او رفح د حماس اخېري دوه مرکزونه پاتې دي. امریکې، برطانیې، يورپین یونین او ځینو نورو ملکونو حماس ترهګر تنظیم ټاکلی دی.

رفح د مصر سره په پوله پروت ښار دی او چارواکي خبرداری کوي چې په سیمه کې پوځي عملیات او یا په لویه شمېره کې د سرحد پورې خلکو تګ د 40 کلونو امن معاهده کمزوري کړي.

غزه زیات انساني امداد د رفح دلارې رسوول کېږي او په ښار کې جګړه به امدادي کوښښونه متاثره کړي.

تېره شپه اسرایل په رفح کې تازه حملې شروع کړې چې په کې د عیني شاهدینو او د هسپتال د چارواکو په وېنا د ښځو او ماشومانو په شمول لږ تر لږه اته کسان ووژل شوو.

د نېټن یاهو د اعلان نه څو ګنټې مخکې د امریکې صدر جوبایډن خبردار وکړو چې په پوځي عملیاتو کې د اسرایل چلند د "سر نه ختلی دی" یعنې ډیر زیات دی.

د زیارت، پنجشنبې، په ورځ ناوخته د یو خبري غونډې په مهال په اسرایل دا د بایډن ټولو نه زیات سخت تنقید وو.
په اووم اکتوبر په اسرایل د حماس د حملې وروسته چې په کې 1200 کسان وژل شوي او تر 250 پورې نور کسان په کې حماس یرغمال نیولي وو، اسرایل د حماس د ختموول دپاره په غزه کې پوځي عملیات شروع کړي دي.

په غزه کې د حماس د انتظام لاندې د صحت وزارت وايي په غزه کې تر اوسه د 27000 نه زیات فلسطینیان وژل شوي دي.

د امریکې د دفاع وزارت، پېنټګان، د جمعې په ورځ وویل د امریکې د دفاع وزیر لواېډ اسټن د زیارت، پنجشنبې، په ورځ د خپل اسرایلي‌هم منصب یواو ګېلېنټ سره خبرې وکړي او په دې خبره یې ټینګار وکړو چې په داسې مهال چې اسرایل د حماس خلاف عملیات کوي،‌ اسرایل دې دا خبره یقیني چې ملکي خلک محفوظ وساتل شي.

د وایټ هاوس د نېشنل سېکیورټي کاونسل ترجمان جان کربي هم د اسرایل ته د رفح د خالي کولو په سر سخت خبرداری ورکړو.

د ملګرو ملتونو مشر اېنټونیو ګوټېرېس وویل که اسرایل رفح ته عملیات پراخ کړل نو لویه "غمیزه" به رامنځته شي.