د خېبر پښتونخوا حکومت په ناکراره قبایلي ضلعه کوزه کورمه کې د ډپټي کمشنر په قافله له شوي برید وروسته دغه پېښه کې د ککړو کسانو په ضد د سخت اقدام پرېکړه کړې ده.
د خالي- شنبې په شپه ناوخته د وزیراعلا علي امین ګنډا پور په مشرۍ راجوړه شوې یوه بېړنۍ غونده کې چارواکو ته لارښوونه شوې چې پېښه کې د ککړو ټولو کسان په ضد باید مقدمې درج اؤ هغوي ونیول شي.
د غونډې په اړه مطبوعاتو ته د ورکړل شوي سرکاري بیان تر مخه په دې غونډه کې د صوبې چیف سیکرټري اؤ د پولیسو مشر هم برخه درلوده اؤ د خالي د ورځې د رامنځته شوي برید نه وروسته د غونډې برخه والو د سیمې په وضعیت غور اؤ بحث کړی دی.
غونډه کې پرېکړه شوې ده چې په کورمه کې د امن له ترسره شوي تړون وروسته د تړون څخه د سرغړونې ذمه وار دي نو ځکه باید پېښه کې ککړ ټول کسان قانون ته وسپارل شي.
غونډه کې ویل شوي چې د هیڅ یو ترهګر سره به نرمي نه کیږي اؤ د هغوي سره مرسته کوونکي به هم نیول کیږي.
په غونډه کې دا هم ویل شوي چې کومو ترهګرو دا برید کړی د هغوي د سرونو قیمت به مقررولی شي.
د جمعې په ورځ د کوزې کورمې په بګن سیمه کې د ډپټي کمشنر په قافله نامعلومه وسله والو برید کړی ؤ چې پکې ډپټي کمشنر جاوېد الله مسېد، درې د ایف سي اؤ یو د پولیس عسکر اؤ یو بل لاروی ژوبل شوي وؤ.
د کورمې په انتظامي مشر دا برید په داسې حال کې شوی چې د جنوری په وړومبۍ نېټه په کورمه د شيعه او سني ټولنو ترمنځ د حکومت په منځګړيتوب جرګه ترسره شوې جرګه کې دواړو فريقينو د امن په لوظنامه لاسيلکونه کړي وؤ.
د امن د ترسره شوي دغه تړون نه وروسته ټاکل شوې وه چې پرون د خالي په ورځ به د75 ټرکونو یوې قافلې کورمې ته امدادي سامان رسولو .
د کورمې ډپټي کمشنر دغه امدادي قافلې ته د لارې هوارولو لپاره سیمې ته تللی ؤ چې په بګن کې نامعلومه وسله والو د هغه په قافله ډزې وکړې.
د کورمې په ډپټي کمشنر د شوي برید ذمه واري لا په سمدستي توګه چا پغاړه نه ده اخستې خو سرچینې وایي چې له پېښې وروسته په ګڼ شمیر کې امنیتي ځواکونه د پېښې ځای ته رسیدلي اؤ د لټونې عملیات یې پیل کړې دي.
د افغانستان سره په پوله پرتې د خېبرپښتونخوا کورمې ضلعې کې د روان کال اکتوبر د 12مې راهسې د شيعه او سنيانو ترمنځ نښتې شوې، د ټل، پاړاچنار لاره تړل شوې، او د بيا د 21م نومبر راهسې په بېلابيلو پېښو کې د 135 نه زيات کسان مړه شوي او 180 نور ژوبل شوي وو، دغه لاره بنده پاتې ده.
Forum