پاکستان کې سږ کال د پوليو شپږمه پېښه د بلوچستان صوبې د قلعه عبدالله څخه مخې ته راغلې ده، سږ کال دا د بلوچستان صوبې پينځمه او د قلعه عبدالله څخه دويمه پېښه رپورټ شوې ده.
پاکستان کې د پوليو د مخنيوي پروګرام ويلي، تازه پېښه کې د قلعه عبدالله ضلعې د ګلستان يو ماشوم پوليو وهلی دی چې وایي عمر یې یونیم کال وو.
ويل شوي، د متاثره ماشوم په بدن کې د معذورۍ نخښې په درېم جون ښکاره شوې او په هغه کې چې کوم وايرس معلوم شوي دا وايرس په سږنیو ټولو مثبتو پېښو کې موندل شوي دي.
د صحت په برخه کې د وزيراعظم رابطه کار ډاکر ملک مختار برت ويلي، حکومت په بلوچستان صوبه کې د حفاظتي ټيکو د شرحې سېوا کولو او صحت د نظام پياوړي کولو باندې کار کوي، خو نوموړي ويلي، "مونږ يواځې دې ناروغۍ ته ماتې نه شو ورکولی د مياندو پلارانو او ولس مرسته اړينه ده".
هغه ويلي، سږ کال پاکستان کې د 40 څخه په زياتو ضلعو کې په ماحولياتي نمونو کې د پوليو وايرس موندل شوي او دا د ماشومانو دپاره مسلسله خطره ده.
د پوليو د مخنيوي دپاره جوړ بېړني مرکز مشر محمد انوارالحق ويلي، د پوليو وايرس د خلکود يو ځای څخه بل ځای ته په تلو کې منتقل کيږي ځکه ماشومان د دې ناروغۍ څخه ژغورلو موثره لاره د پوليو ضد ويکسين ورکول دي.
بلوچستان کې د پولیو د مخنيوي پروګرام يو چارواکي د نوم ښکاره کولو په شرط وي او اې ډيوه سره وويل، بلوچستان صوبه کې دوی ته د پوليو د مخنيوي په لړ کې ځينې ستونزې ورپېښې دي، په هغې کې په لومړي سر کې عام خلک ماشومانو ته د معمول ټيکې نه لګوي يا واکسين نه کوي، دويمه غټه مسله د تېر کال راهسې د افغانانو د کوټې په لاره زيات تګ راتګ لکه د کراچۍ او ملک ځينو نورو برخو څخه په دغه صوبه خلکو زيات سفرونه وکړل.
چارواکي زياته کړه، د بلوچستان صوبې په 16 ضلعو کې په ماحولياتي نمونو کې د پوليو وايرس معلوم شوي، دا په خپل ځای خطره ده، او په ځينې وختونو کې په کمپاينونو کې ماشومان د څاڅکو څخه پاتې شي او د مياندو پلارانو لخوا د انکار ستونزه هم موجوده ده که څه هم ډېره راکمه شوې ده.
د پاکستان په بلوچستان صوبه کې د پوليو تازه پېښه په داسې وخت کې رپورټ شوې، چې پرون د ګل/ دوشنبې په ورځ د وزيراعظم شهباز شريف په مشرۍ په ملک کې د پوليو د خاتمې دپاره د (نېشنل ټاسک فورس) غونډه شوې او د بل اېنډ ملېنډا ګېټس مشر بل ګېټس پکې ګډون کړی دي.
وزيراعظم ویلي، د پوليو د مخنيوي په لړ کې د کار کوونکو، د پاکستان د عزم او همکارانو په مرسته پاکستان د پوليو خلاف مهم پرمختګ کړی دی خو تر څو چې دا وايرس په ماحول کې موجود دي او ماشومان معذوره کوي تر هغې به کار نه شي بشپړ کېدی.
د پاکستان د سرکاري خبر ترمخه بل ګېټس د پوليو خلاف د پاکستان پرمختګ ستايلی، او زياته کړې یې ده پاکستان کې د پوليو د خاتمې دپاره ژمن دی او د پوليو سره سره به د صحت په نورو برخو کې مرستې دوامداره ساتي.
هغه ویلي، باور لري چې په ګډه د کار ساتلو او نوو تګلارو عملي کولو سره به پاکستان د پوليو خاتمې پله پرمختګ وکړي.
Forum