په زمبابوی کې روان د کرکټ نړیوال جام غواروي سیالیو کې د افغانستان ملي لوبډلې وتلو که یو خوا د افغانستان کرکټ مینه وال راژوندي کړي، دغه لوبو راشد خان له د یو بل نړیوال ریکارډ ترلاسه کولو لاره هم اسانه کړې.
سبا د اتوار په ورځ به د دغه سیالیو په فاېنل یا سر لوبه کې افغانستان وېسټ انډیز ته مخامخ کیږي. د دواړه هیوادونو تر مېنځه شوو تیرو ۴ لوبو کې افغانستان ۲ ګټلي، وېسټ انډیز ۱ ګټلې او یوه لوبه بغیر د څه نتېجې پاېې ته رسیدلی.
افغانستان په تیر نړیوال جام کې هم وېسټ انډیز ته ماتې ورکړې وه او په دغه حساب د افغانستان لوبډله د وېسټ انډیز په ټیم یوه اعصابي بریا لري.
سبانۍ لوبه که څه هم د دواړه هیوادونو لپاره ډیر مهم والې نه لري خو ګټه به يې د ګټونکي هیواد حوصله نوره سېوا کړي. خو د افغانستان راشد خان لپاره سبانۍ لوبه ډیره مهمه ده.
د افغانستان سپېن بالر راشد خان که سبا یو وکټ ترلاسه کړي نو د کرکټ په نړۍ کې به په کمو لوبو کې د ۱۰۰ وکټو ترلاسه کولو ریکارډ په خپل نوم کړي.
راشد خان دا مهال په ۴۳ یوه ورځني لوبو کې ۹۹ وکټې ترلاسه کړي. د سبانۍ لوبې یو وکټ به هغه د نړۍ هغه لومړنې لوبغاړی کړي چې په ۴۴ مېچونو یا لوبو کې به ۱۰۰ لوبغاړي وسوځوي.
دا مهال دغه ریکارډ د اسټریلیا تیزاو غوره بالر مېچل سټارک سره دی چا چې په کال ۲۰۱۶م کې دغه ریکارډ په خپل نوم کړو او په ۵۲ لوبو کې ۱۰۰ وکټې ترلاسه کړې وې.
د نړۍ ځېنو غوره بالران چې په لږو لوبو کې يې د ۱۰۰ وکټو رېکارډ جوړ کړی څه په دا ډول دي:
| لوبغاړی | هیواد | لوبې | د ۱۰۰ وکټو موده |
| مېچل سټارک | اسټریلیا | ۵۲ | ۵ کاله ۳۰۴ ورځې |
| ثقلین مشتاق | پاکستان | ۵۳ | ۱ کال ۲۲۵ ورځې |
| شېن اېدورډ بانډ | نیوزيلېنډ | ۵۴ | ۵ کاله ۱۲ ورځې |
که سبا راشد خان دغه یو وکټ ترلاسه کړي نو هغه به د نړۍ یواځېنی لوبغاړی شي چې په کمو لوبو او کم عمرۍ کې په ۲ کاله او ۵ میاشتو کې دغه نړیوال ریکارډ په خپله نامه کړي.
راشد خان د کال ۲۰۱۵م اکتوبر په میاشت کې د زمبابوی پرضد د افغانستان ملي لوبډلې لخوا خپله لومړۍ لوبه کړې وه. د دوه نیم کالو په دغه لوبه کې راشد خان په یوه لوبه کې د ۷ وکټو ترلاسه کولو تر ټولو غوره بالنګ کړی. راشد خان په یوه ورځنۍ لوبو کې ۵ لوبغاړي په ۴ لوبو کې سوځولي او هم دغه راز يې په ۴ لوبو کې د څلورو څلورو لوبغاړو په سوځولو هم د خپلې لوبډلې په ګټه کې مهم رول ترسره کړی.
د کرکټ نړیوالې شورا یا ايي سي سي لخوا د تیرې (فرورۍ) په میاشت کې راشد خان د یوه ورځنۍ او شلو شلو اورونو یا ټي-۲۰ لوبو غوره بالر ټاکل شوی دی.
راشد خان د افغانستان ملي لوبډلې لپاره د یوه ورځنۍ لوبو تر څنګ په ۲۹ ټي-۲۰ لوبې کړي او ۴۸ وکټې یې ترلاسه کړي. سره د دې راشد خان د هندوستان، اسټریلیا، برتانیې، وېسټ انډیز او بنګله دېش په لیګ مېچونو کې هم لوبیږي او دغلته هم کامیاب بالر ګڼل کیږي.
