پاکستاني ځواکونو د روان کال د اپرېل له لومړۍ نېټۍ څخه تر لسم جون پورې په پښتونخوا، بلوچستان او سيند صوبه کې 7000 عمليات کړي او 181 "ترهګر" یې وژلي دي.
دغه خبر د پاکستان سرکاري (رېډيو) خپور کړی دی، خو په خبر کې سرچينه نه ده ښودل شوې چې دا شمېرې چا شريکې کړي دي او ځينې پاکستاني مطبوعاتو د امنيتي سرچينو له قوله دغه خبر خپور کړی دی.
د پاکستان پوځ په خپله وېبپاڼه دغه خبر يا شمېرې نه دي شريکې کړي.
د رېډيو پاکستان په خبر کې دعوه شوې، ترهګر د پولې د پورې غاړې (افغانستان) څخه را اوښتو په وخت وژل شوي دي. په خبر کې زياته کړل شوې په وخت د امنیتي ځواکونو د ځواب ورکولو سره "د تحریک طالبان پاکستان (ټي ټي پي) ارادې ناکامه کړل شوي دي".
دغه خبر ته تراوسه پورې د ټي ټي پي کوم ځواب مخې ته نه دی راغلی.
په سرکاري خبر کې زياته کړل شوې، په باجوړ، دير او چترال کې د پټو معلوماتو په اساس د حملو هڅې ناکامه کړل شوي، او د چينايي اينجينيرانو په نخښه کولو کې ککړ د ټي ټي پي نېټ ورک نيول شوی دی.
په 26م مارچ د خېبرپښتونخوا د شانګلې ضلعې په بشام کې د داسو ډېم په چينايي انجينيرانو ځانمرګی برید شوی، پينځه چينايي وګړي او پاکستانی ډرايور یې پکې وژل شوي وو. هغه وخت تحريک طالبان پاکستان د دغه بريد څخه د لاتعلقۍ اعلان کړی وو.
خو د پاکستان حکومتي او پوځي مشرانو د دغه پېښې ذمه واري په تحریک طالبان پاکستان ور اچولې، او تور یې لګولی چې د افغانستان خاوره په دوامداره توګه د پاکستان پرضد د ترهګرۍ دپاره کاريږي، خو په افغانستان کې واکمنو طالبانود پاکستان دغه ډول تورونه تل رد کړي دي.
پاکستاني مطبوعاتو د امنيتي سرچينو له قوله ویلي، د دوو مياشتو نه په زياته موده کې امنيتي ځواکونو په 7745 عملياتو کې په خېبرپښتونخوا کې 2701، بلوچستان کې 4902 او سيند صوبه کې 142 عمليات کړي دي.
ويل شوي په وژل شوو 181 ترهګرو کې 128 په خېبرپښتونخوا، 51 په بلوچستان او دوه په سيند کې وژل شوي دي.
د مې په اوومه نېټه د پاکستان د پوځ وياند لفټننټ جنرل ارشد شريف چودري په يوه خبري غونډه کې ويلي وو، روان کال امنیتي ځواکونو ټول 13,135 غټ واړه عمليات کړي، 239 ترهګر یې وژلي او 396 يې نيولي دي، او هره ورځ د 100 پورې عمليات کيږي، په دغو عملياتو کې 19 مهم ترهګر وژل شوي او نيول شوي هم دي.
هغه ويلي وو، روان کال په دغو عملياتو کې دوه افسران او 60 پوځي اهلکار وژل شوي دي. وسله وال ځواکونه به د ملک څخه ترهګري ختموي او دا کاميابه جګړه به د وروستي ترهګر د خاتمې پورې روانه وي.
د پيکس رپورټ
پاکستان کې د شخړو او امنيت د مطالعاتو څيړنيزې غېر حکومتي ادارې پاکستان انسټيتیوټ فار کنفلیکټ اېنډ سیکيورټي سټډیز (پيکس) ويلي، د مې په میاشت کې په ملک کې د ترهګرۍ پېښې 12 فيصده سېوا شوي او امنيتي ځواکونو 82 جنګيالي وژلي وو.
د روانې مياشتې په درېمه نېټه خپور کړي رپورټ کې پيکس ويلي وو، د اپرېل د مياشتې په مقابله کې په مې کې ترهګري سېوا شوې او وژنو کې هم 29 فيصده اضافه ليدل شوې وه.
په رپورټ کې د مې په مياشت کې په ملک کې د 86 ترهګرو پېښو ويل شوي، 90 کسان پکې وژل شوي چې پکې 48 ملکي وګړي، 22 امنيتي ساتونکي او 20 جنګیالي شامل وو.
پيکس ويلي وو، د مې په میاشت کې د پاکستاني پوځ، نورو امنیتي ادارو او پولیسو د کارروايانو په وخت 70 کسان وژل شوي، 62 پکې جنګيالي او اته د امنيتي ځواکونو غړي شامل وو. د رپورټ ترمخه د مې په مياشت کې په مجموعي ډول 82 جنګيالي وژل شوي، 62 پکې د امنیتي ځواکونو په عملیاتو او 20 د حملو په وخت ځوابي عملياتو کې وژل شوي وو.
پيکس ویلي وو، په تيرو اووه کلونو کې د جنګیالو د وژنو دا شمېره په کومه يوه میاشت کې تر ټولو زياته شمېره وه.
په رپورټ کې ويل شوي د مې په مياشت کې په 86 پېښو کې 33 په پخوانۍ فاټا، 24 په خېبرپښتونخوا او 23 په بلوچستان کې شوې وې. پخوانۍ فاټا کې 30 کسان، خېبرپښتونخوا کې د ورګډو ضلعو نه علاوه نورو سيمو کې 37 کسان وژل شوي، او ټول 64 کسان ژوبل شوي وو.
پيکس ويلي وو، د روان کال (2024م) په لومړو پينځو مياشتو کې په ملک کې د ترهګرۍ ټولې 409 پېښې شوې، 414 کسان پکې وژل شوي او 474 ژوبل شوي وو.
Forum