په سعودي عربستان کې په لومړي ځل ښځو ته اجازه ورکړل شوې، چې لوبغالي ته ورشي او د فوټبال لوبه وګوري. ځینو مېرمنو د خپلې کورنۍ له کسانو او ځینو له خپلو همځولو سره له لوبې خوند اخیستی.
د سعودي غوندې په رجعتي او زوړپالې ټولنه کې د ښځو په اړه په سختو قوانینو او روایاتو کې بدلونونه د هغې لړۍ یوه کړۍ ده، چې د اوسني باچا زوی ولیعهد شهزاده محمد بن سلمان پیل کړې ده او مقصد یې له خپل هېواد د رجعتي فکرونو ختمول دي
د تېرې جمعې په ورځ شاوخوا ۳۰۰ سعودي مېرمنې- چې د عبایه په نوم تورې چادرۍ یې اغوستې وې- په (جده) ښار کې د (شاه عبدالله) په نوم لوبغالي ته تللې وې او د (الهالي) او (الباطن) لوبډلو تر منځ د فوټبال لوبه یې وکتله.
د فوټبال په دې لوبه کې د نورو هېوادونو غوندې ښځې او سړي د لوبې کتلو ته ګډ ناست نه وو، بلکې د ښځو لپاره د لوبې کتلو ځانګړی ځای جوړ شوی وو، چې یواځې هغو کسانو پکې د ناستو اجازه لرله، چې د خپلو کورنیو له ښځو سره یې لوبه کتله.
په لوبه کې د هلکانو او نارینوو تر څنګ نجونو ته هم دا اسانتیا برابره شوې وه، چې پر خپلو مخونو د خپلې خوښې د لوبډلو بیرغ جوړ کړي.
د لوبې په مهال کلک امنیت نیول شوی وو او په لوبغالي کې ښځینه پولیسې هم د امنیت ساتلو په چاره ګومارل شوې وې.
سعودي مېرمنو له رسنیو سره په خبرو کې خپله خوشالي څرګنده کړه او له خپل حکومته یې مننه وکړه، چې دوی ته یې د لوبې کتلو موقع برابره کړه. د دوی پر څېرو دومره خوشالي وه، لکه له زندانه چې را خوشې شوې وي.
۳۲ کلنې لامیه خالد ناصر د فرانس خبري اېجنسۍ اې ایف پي ته وویل، د لوبې په لیدو د خپلې خوشالۍ اظهار نه شي کولای:
"د حکومت دا ګام څرګندوي چې موږ د ښه مستقبل خواته روان یو او زه چې دا لوی بدلون په خپلو سترګو وینم، نو ډېر د ویاړ إحساس کوم"
په سعودي عربستان کې له اوږدې مودې د ښځو په اړه ډېر سخت بندیزونه دي، چې په نړیواله توګه د بشري حقونو د سازمانونو له خوا وخت په وخت ورباندې نیوکې شوې دي. په سعودي کې په دفترونو کې د کار کولو تر څنګ تر اوسه ښځو ته په ازاده توګه د ګرځېدو اجازت نه شته.
خو د سعودي د اوسني باچا سلمان بن عبدالعزیر تر راتګ وروسته د ښځو د حقوقو په برخه کې اصلاحات پیل شوي دي. محمد بن سلمان چې د باچا راتلونکی ځایناستی به وي، تېر کال د حکومت له خوا پر ښځو د موټر چلولو بندیز لرې کړ او اجازه یې ورکړي چې سعودي مېرمنې کولای شي موټر وچلوي او د موټر چلولو په وسیله خپله مزدوري وکړي.
ټاکل شوې چې سږ کال په سعودي عربستان کې ښځو ته په سېنما کې د فلم کتلو اجازه هم ورکړل شي. دا له څه دپاسه ۳۰ کلونو وروسته لومړی ځل دی، چې پر سېنما تر بندیز لرې کېدو وروسته به ښځې وکولای شي، د اسلام په مرکز سعودي کې په لویو سېنماګانو کې هم فلمونه وګوري.
