​ د کورمې برید کې ژوندي پاتې شوي د خپلو سترګو لیدلی حال بیانوي،وایي"دا شېبې له یو قیامت کمې نه وې"

"زما ګاډی د قافلې په منځ کې وؤ، د ګولیو د تړاقا جوړېدو سره سم ما سورلیو ته وویل چې سمدست باید له ګاډي کوز شي، د ځانونو بچ کولو په خاطر مونږ نزدې د یو غره لوري ته مخه وکړه خو هلته هم د ګولیو باران پېل شو چې له هغې وروسته د ویرې نه ما ځان سمبال نه کړی شو اؤ د یوې تېږې سره مې سر ولګیدو، سر اؤ د بدن نورې برخې مې زخمي شوې"

دا په هغه قافله کې د شامل جمشېد حسین خبرې دي چې د زیارت په ورځ پرې کورمه کې نامعلومه وسله والو برید کړی ؤ اؤ په دغه برید کې تر 45ؤ زیات کسان وژل شوي اؤ ګڼ شمیر نور ژوبل شوي دي.

په دې خونړي برید کې جمشېد په لږ څه کې بچ شوی ؤ اؤ د هغه په خبره "هغه شېبې په هیڅ توګه له قیامت کمې نه وې، ما په ژوندوني قیامت لېدلی ؤ."

امریکا غږ سره خبرو کې جمشېد وویل کله چې د یوې میاشتې لپاره تر تړلو کېدو وروسته د پاړا چنار اؤ پېښور د سړک پرانستل کېدو اعلان وشو نو هغه ډیر خوشحاله ؤ ځکه چې د بې وزلۍ له امله هغه زیات وخت کور کې په ناسته نه شو تېرولی.

جمشېد حسین د پيشې له لحاظه ډرایور دی اؤ هغه د اوږدې مودې راهسې د پاړا چنار اؤ پېښور په سړک د ګاډي چلولو له لارې ځانته روزي ګټي.

د جمشېد خان په وینا کله چې د زیارت په ورځ د اوچت په مقام برید کوونکو د مسافرو په ګاډو ډزې وکړې نو هغه خواو شا تر ۲۰ دقیقو د خپل ګاډي په خوا کې دم ختلی پروت ؤ، خو وایي چې د ډزو د غږ غلي کېدو وروسته یې کله خپل ګاډي وکتلو نو د ګاډي مخکۍ شیشه اؤ بیلابېلې برخې یې په ګولیو لګېدلې وې.

د کورمې ضلعې د ډپټي کمشنر جاوید الله مسید د وینا له مخې په سیمه کې د لټونې عملیات پیل کړی شوي اؤ پېښه کې د ژوبل کسانو د علي زئ، ټل سي ایم ایچ، پاړا چنار اؤ نورو هسپتالونو کې علاج روان دی.

هغه ویلي چې د ترهګرۍ دې پېښه کې د اتوؤ مېرمنو په ګډون 41 کسان وژل شوي خو ازادې سرچینې بیا وایي چې اوس د مړینو شمیره 45ؤ ته رسېدلې ده.

د پاړا چنار ځایي خبریال محمد علي طوري امریکا غږ ته ویلي په سیمه کې د دریوؤ ورځو ویر یا ماتم اعلان کړل شوی ، ټول کاروباري مرکزونه اؤ سکولونه تړل شوي دي.

هغه وایي چې په دې پېښې خلک په ویره اخته او غصه اخته کړي ، د ښار مرکزي سړک د ټریفک په مخ تړل شوی اؤ د انټرنیټ اؤ موبایل فون سګنلې هم تړل شوې دي.

د علي طوري وینا ده چې ځایي مشرانو پرېکړه کړې چې د وژل شوؤ کسانو جنازه به په اجتماعي ډول نه کوي بلکې جلا،جلا جنازې به یې کولی شي.

دلاور حسین ددې پېښې د متاثرینو یا اغېزمنو څخه دی اؤ د حملې په وخت هغه هم د مسافرو یو ګاډي کې سور ؤ.

هغه وایي کله چې ګاډی د بګن سیمې څخه تېر اؤ د اوچت حدودو ته دننه شو نو نامعلومه کسانو په ګاډو ډزې پېل کړې چې په دغو ‌ډزو کې د هغوي ګاډی هم ګېر شو.

دلاور حسین دغو ډزو کې په ژوبل شوی اؤ په پېښه یې یوه ګولۍ لګېدلې ده خو هغه په علیزئ هسپتال کې د ابتدایي علاج څخه وروسته له روغتونه کور ته لېږل شوی دی.

دلاور حسین وایي علیزئ هسپتال کې هیڅ اسانتیاوې نشته ځکه نو له دې ځایه د ضروري طبي مرستو وروسته سخت ژوبل کسان د ټل پوځي روغتون، پاړا چنار اؤ پېښور ته لېږدول شوي دي.

د کورمې ددې خونړي برید ذمه واري لا چا هم پغاړه نه ده اخستې.

په قبایلي ضلعه کورمه کې د اوږدې مودې راهسې په روانو فرقه ییزه نښتو اؤ فرقه ییزه تشدد کې په سوونو کسان وژل شوي دي.

تېره میاشت هم د دې سیمې د کنج علیزئ په مقام د مسافرو په یو ګاډي شوي برید کې تر10ؤ زیات کسان وژل شوي اؤ ګڼ شمیر نور ژوبل شوي وؤ.

تر هغې وړاندې په دې سیمه کې د ځمکمې په شخړه پېل شوې نښتې په فرقه ییزه نښتو بدلې شوې وې چې پکې تر 40 ؤ زیات کسان وژل شوي اؤ نزدې 150 نور ژوبل شوي وؤ.

سږکال د اګست میاشت کې د فرقه ییزه نښتو له امله د بره اؤ کوزې کورمې تر منځ غځېدلې لویه لاره د هر رقم ټریفک لپاره تړل شوې وه ، د پولیسو د وینا له مخې د سیمه ییزې جرګې په هڅو دغه سړک تېره اونۍ یو ځل بیا پرانستل شوی ؤ اؤ د قافلو په شکل پرې ګاډو ته د تېرېدو اجازه ورکړل شوې وه.

په قبایلي چارو نظر لرونکي کار پوهان د کورمې پېښه د فرقه ییزه فساداتو نه زیاته د ځکمې شخړه ګرځوي.

پېښور پوهنتون کې د جرنلزم د څانګې استاد ډاکټر سید عرفان اشرف وایي د کوهاټ نه واخله تر پاړا چنار پورې ټوله سیمه کې سنیان اؤ شیعه ګان اوسیږي اؤ دوي په یو بل تکیه یا انحصار لري.

د هغه په وینا په کال 2018م کې په ایین کې د ترمیم کولو له لارې پخوانۍ قبایلي سیمې په خېبر پښتونخوا صوبه کې ورګډې کړل شوې خو دغلته د لسیزو راهسې روانو د ځکمو شخړو ته هیچا پام ونه ګرځولو.

امریکا غږ سره خبرو کې هغه اندېښنه وښودله چې راتلونکو ورځو کې د ځمکو شخړو کې د افرادو پځای لویې لویې قبېلې یو بل ته راپورته کیدای شي.

د خېبر پښتونخو د کورمې ضلعې پوله د دریوؤ لوریو څخه د افغانستان سره لګېدلې یوه پوله یې د پاکستان سره پیوست ده .

ددې ضلعې سر ښار پاړا چنار دی چې د شیعه مسلک مسلمانان پکې په اکثریت سره میشت دي.

یاډونه:
( د دې خبر معلومات د وي او ای اردو څانګې د خبریال نذراسلام د رپورټ څخه اخیستل شوي دي)