د افغانستان واکمنو طالبانو اعلان کړی چې په پکتیا ولایت کې به یو مبینه قاتل ته د قصاص په بنیاد سزا ورکول کېږي او د پکتیا "ملکي، نظامي ادارو، مسؤولینو، مجاهدینو، علماء کرامو او عام ولس" ته یې بلنه ورکړې چې په دې "صحنه" کې ګډون وکړي.
د طالبانو د پکتیا ولایت د مطبوعاتو دفتر د نهې، سه شنبې، په ورځ په اېکس یو پېغام کې وویل مبینه قاتل ته به سزا د پکتیا مرکز ګرديزد لوبو په سټېډيم کې د شورو، چهارشنبې، په سحر ورکړی کېږي.
طالبانو خبرداری وکړو چې مبینه قاتل ته سزا د ورکولو په "صحنه (منظر) کې عکس، ویډیوګانې او تلیفون بند دی."
که په پکتیا کې دغه تن ته سزا ورکړی شوه نو په کال ۲۰۲۱ کې په افغانستان د طالبانو د بیا واکمنېدو نه پس به دا شپږم تن وي چې په عامه ځای کې به ورته د مرګ سزا ورکړی شي.
طالبانو په خپل اعلان کې نه دي ویلي چې د مرګ سزا به څنګه عملي کوي خو په تېرو وختونو کې د مرګ سزا شوی خلک په ډزو ويشتل شوي دي.
ملګرو ملتونو خلکو ته د سټيډیم په شان په عامه ځایونو کې د طالبانو په سزاګانو د تشویش اظهار کړی دی او دا يې غېر انساني او د انساني وقار په ضد بللي دي.
طالبانو د هم جنس پرستۍ، جنسي عمل، غلا او د شوکې په شان د الزاماتو په سر په سلګونو ښځو او سړو ته د دورو سزاګانې ورکړي دي.
د طالبانو د سپریم کورټ د شمېر ترمخه د اکتوبر په میاشت کې د ښځو په شول ۱۰۰ افغانان په دغه ډول الزاماتو په دورو وهل شوي او د شپږو میاشتو نه تر د دوو کلونو پورې د قېد سزاګانې ورکړی شوي دي.
د ملګرو ملتونو ماهرینو او د انساني حقونو تنظیمونو د طالبانو دغه ډول سزاګانې د انساني حقونو او د نړیوال قانون خلاف ورزي بللي او په طالبان يې غږ کړی چې ويې دروي.
Forum