ټرمپ د خارجه او دفاع وزارتونو په ګډون د خپل حکومت د مهمو څوکیو لپاره کسان ونومول

د امریکې منتخب صدر ډانالډ ټرمپ به د خپل راتلونکي حکومت واک په رسمي توګه د 2025م کال د جنورۍ پر 20 کار تر لاسه کوي، خو له اوسه یې لا د خپلې کابینې او حکومت د مهمو پوستونو لپاره یو شمېر ریپبلکن سیاستوال نومولي دي.

ټرمپ په ټاکنو کې تر بریا وروسته په فلورېډا ایالت کې په خپل کور کې له خپلو نیزدې کسانو او د واک د منتقلۍ له ټیم سره د صدارت د دویمې دورې لپاره د خپلو حکومتي تګلارو د جوړولو په اړه سلا مشورې کوي.

ټرمپ د سه شنبې- نهې په ورځ د دفاع وزیر، د کورني امنیت د ادارې مشر، د سي آی اې مشر، د حکومتي کارکردګۍ د ادارې مشر، په ملګرو ملتونو کې د امریکې سفیره، د ملي امنیت سلاکار او په اسرایل کې د امریکې سفیر او نور کسان وټاکل.

د بهرنیو چارو وزیر مارکو روبیو

د رسنیو د رپوټونو له مخې، کېدای شي د فلورېډا ریپبلکن سنېټر مارکو روبیو د امریکې د بهرنیو د چارو وزیر یا سټېټ سیکرټري په توګه د ټرمپ انتخاب وي.

53 کلن مارکو روبیو د ایران، کیوبا او چین په اړه د سختو دریځونو په خپلولو مشهور دی. هغه د کیوبا د یوې کډوالې کورنۍ اولاد دی او د فلوریډا په میامي کې زېږېدلی دی.

روبیو یو وکیل، سیاستوال او د فلوریډا د ډېرې مودې سنېټر دی، چې له 2011م راهیسې د امریکې په سېنټ کې دی.

هغه د امریکې د 2016م کال په صدارتي ټاکنو کې د ټرمپ سیال وو، خو دواړو سیاستوالو په وروستیو کلونو کې نیزدې اړیکې لرلې دي.

د دفاع وزیر پیټ هېګزیت

ټرمپ په یوه جلا بیان کې اعلان وکړ چې د فاکس نیوز د سیاسي پروګرامونو چلوونکی او پخوانی پوځي افسر پیټ هېګزیت به یې په راتونکې کابینه کې د دفاع د وزیر په توګه دنده ولري.

هېګزیت په 2003م کال کې د امریکې له پرینسټن پوهنتونه فارغه شوی او له هغه وروسته په پوځ کې د خدمت پر مهال په عراق او افغانستان کې دندې تر سره کړې دي.

د دفاع د وزیر په توګه د هېګزیت نومول کېدل د ډېرو د توقعاتو خلاف ده چې ددغې څوکۍ لپاره یې د ځینو پېژندل شویو څېرو د نومول کېدو اټکل کاوه. هېګزیت د ټرمپ د تګلارو کلک ملاتړی دی او له بهره یې د امریکايي سرتېرو د را ستنېدو پلوي کوله.

د سي ای اې مشر جان رېټکلیف

ټرمپ د سه شنبې- نهې په ورځ اعلان وکړ چې د استخباراتو د ملي ادارې پخوانی مشر جان رېټکلیف یې د مرکزي استخباراتي ادارې (سی ای اې) د مشر په توګه غوره کړی دی.

رېټکلیف د ټرمپ د لومړي صدارت په وروستیو اتو میاشتو کې د استخباراتو د ملي ادارې مشر وو او له هغه وړاندې یې د امریکې په استازو اېوان کې د ټېکساس د استازي په توګه دنده ترسره کړې ده.

د داخلي امنیت وزیره کریسټي نووم

د رسنیو د رپوټونو له مخې، د جنوبي ډیکوټا ګورنره کریسټي نووم د هوم لېنډ سیکیورټي یا کورني امنیت ادارې د مشرۍ لپاره د ټرمپ انتخاب دی.

52 کلنه کریسټي نووم د ټرمپ کلکه ملاتړې ده، چې لومړی د صدارتي ټاکنو لپاره د هغه په ممکنه مرستیالانو کې هم شامله وه.

مېرمن نووم د سویلي ډیکوټا په واټرټاون کې زېږیدلې او اوس د امریکې په حکومت کې د یو ډېر حساس پوسټ ذمه واري پر غاړه اخلي. هغه د سایبري ګواښونو یا ترهګریزو اقداماتو د مخنیوي سره سره به د غیرقانوني مهاجرینو پر ضد د ټرمپ د ایجنډا په عملي کولو کې هم رول ولوبوي.

کریسټي نووم په سیمه کې د ایران د ناارامه کوونکو سیاستونو په ځانګړې توګه د اسرایل خلاف اقداماتو په وجه د تهران په ضد د شدید عمل ملاتړې ده. هغې وار په وار د حماس په څېر ترهګرو ډلو د ملاتړ او د بشري حقونو د سرغړونې له امله پر ایران نیوکې کړې او د تهران خلاف یې د سخت چلند غوښتنه کړې ده.

د ملي امنیت سلاکار مایکل والټز

مایکل والټز د امریکې د کانګرس د استازو اېوان ریپبلکن غړی او د ملي امینت د سلاکار څوکۍ ته نومول شوی دی.

د رسنیو د رپوټونو له مخې، مایکل والټز د امریکې د پوځ یو پخوانی پوځي دی چې په افغانستان، افریقا او منځني ختیځ کې یې هم دنده تر سره کړې او کېدای شي د ټرمپ د ملي امنیت سلاکار شي. مایکل والټز د چین، ایران او طالبانو خلاف د سخت دریځ له کبله مشهور دی.

هغه د فلوریډا په بوینټن بیچ کې زېږېدلی او د ویرجینیا په پوځي انسټیټیوټ کې یې د نړیوالو اړیکو زده کړې ده. والټز د ترهګرۍ خلاف د مبارزې ملاتړی او په افغانستان کې د طالبانو پر حکومت یې پرله پسې نیوکې کړې دي.

د سرحدي چارو د ادارې مشر ټام هومن

ټرمپ د دوشنبې- ګل په ورځ د خپل صدارت په لومړۍ دوره کې د کډوالو او کسټم د کنټرول ادارې مشر ټام هومن د سرحدي چارو د مشر "بارډر زار" په توګه نومولی دی.

هومن په داسې حال کې دغې څوکۍ ته ټاکل شوی چې د امریکې د راتلونکي حکومت له مهمو پلانونو څخه یو له دغه هیواده د غیر قانوني مهاجرینو ډله ییز ایستل دي.

62 کلن ټام هومن د نیویارک په ویسټ کارټېج سیمه کې زېږېدلی. هغه د اوباما او ټرمپ په حکومتونو کې د پولیسو پخوانی افسر او د کډوالو د چارو چارواکی وو.

هومن د غیرقانوني کډوالو د ایستلو پلوی او د امریکا په بېلابېلو برخو کې د کډوالو د اوسېدو لپاره د "پناه ځایونو" جوړولو مخالف دی.

هومن امریکا ته د غیرقانوني کډوالو د ننوتلو او د انساني قاچاق د مخنیوي لپاره د پولو د کنټرول او د غیرقانوني مهاجرینو خلاف د سختو پالیسیو عملي کول ضروري ګڼي.

په ملګرو ملتونو کې د امریکې استازې الیس سټیفانیک

ټرمپ د یکشنبې- اتوار په ورځ، د کانګرس د استازو اېوان کې د نیویارک ریپبلکن غړې الیس سټیفانیک په ملګرو ملتونو کې د امریکې د سفیرې په توګه ونوموله.

ټرمپ په یو بیان کې مېرمن سټیفانیک د "لومړی امریکا" په تګلاره کې د پرمختګ لپاره "ډېره پیاوړې، سخت کاره او هوښیاره مبارزه" وبلله.

40 کلنه سټیفانیک د نیویارک په الباني ښار کې زېږېدلې او په استازو اېوان کې د ټرمپ په کلکو ملاتړو کې ګڼل کېږي.

له هارورډ پوهنتونه فارغه سټیفانیک اسرایل پلوه ده چې د هارورډ، پینسلوېنیا او ایم آی ټي پوهنتونونو پر مشرانو یې له دې کبله نیوکې کړې چې په کېمپسونو کې یې د اسرایل ضد احتجاجونو ته اجازه ورکړې وه.

هغې نیویارک ټایمز ورځپاڼې ته ویلي په کابینه کې د ګډون لپاره یې د ټرمپ بلنه منلې ده.

د ټرمپ د تېر حکومت ځینې شخصیتونه نه ګومارل

ډانلډ ټرمپ په رسمي ډول د هغو دوو اعلی چارواکو د نه ګومارلو اعلان کړی، چې د ده په تېرحکومت کې یې دنده ترسره کړې وه. په دوی کې په ملګرو ملتونو کې د امریکې پخوانۍ استازې نیکي هیلي او د بهرنیو چارو پخوانی وزیر مایک پمپېیو شامل دي.