د افغانستان سره په پوله پرتې د خېبر پښتونخوا نارامه ضلعه شمالي وزيرستان کې په يو وسله وال بريد کې درې تنه وژل شوي دي، پوليس پېښه تاييدوي او وايي، دوه تنه په ګاډي کې سوځول شوي او بل په سوځېدلي حالت کې تښتول شوی او وروسته یې مړی ترلاسه شوی دی.
د شمالي وزیرستان ميرعلي تاڼې يو چارواکي د نوم نه ښکاره کولو په شرط وي او اې ډيوه ته وويل، دا پېښه نن د چارشنبې- شورو په ورځ غرمه نیزدې 11 بجې په حیدرخېل علاقه کې شوې ده.
چارواکي وويل، نامعلومه وسله والو په حیدرخېل کې په يو فيلډر ګاډي ډزې کړي او بيا یې ګاډي ته اور اچولی دی، دوه کسان پکې په ځای سوځېدلي او مړه شوي دي.
هغه زياته کړه، وسله والو درېم کس د ځان سره په سوځېدلي حالت کې تښتولی او وروسته د هغه مړی هم ترلاسه شوی دی.
چارواکي وويل، مړي د ميرعلي روغتون ته وړل شوي، کورنيو یې لا په تاڼه کې رپورټ نه دی درج کړی او پوليسو په خپله د پېښې پلټنې پيل کړي دي.
امنيتي سرچيني وايي، وژل شوي کسان حکومت ته تسليم شوي طالبان وو.
تراوسه پورې د يادې پېښې زمه واري په رسمي ډول چا نه ده منلې، خو په حېدر خېل او خواوشا سيمو کې وخت په وخت هدفي پېښې کيږي.
دوه ورځې وړاندې د خدرخېل نه يو ځوان بې درکه شوی او نن یې په دته خېل تحصيل کې جسد ترلاسه شوی دی، د ميرانشا پوليس تاييدوي چې جسد یې ترلاسه کړی دی.
د وژل شوي تن پېژندګلود زاهد په نوم شوې او هغه د حېدر خېل نه تښتول شوی وو.
کورنۍ يې ويلي، د تورو شيشو فيلډر ګاډی راغلی او هغه یې ځان سره وړی وو.
د پښتون ژغورنې غورځنګ (پي ټي اېم) فعال عيد رحمان وايي، په سيمه کې هدفي وژنې روانې دي، د ميرعلي نه تر دته خېل پورې په لسګونو چيک پوسټونه جوړ دي او په هره چيک پوسته کېمرې لګېدلي او تلاشۍ اخستل کيږي، د حېرانتيا خبره دا ده چې په دغو چيک پوسټونو دا خلک څنګه تيږيږي؟.
پرون په ټانک، بنو او شمالي وزيرستان کې په هدفي پېښو کې پينځه کسان وژل شوي وو.
د شمالي وزيرستان ځايي خلک وايي، په سيمه کې د تيرو څو کلونو راهسې د هدفي وژنو لړۍ دوام لري، او دعوه کوي په دغو پېښو کې ځايي قامي مشران، سياسي فعال او عام خلک د لسګونو په شمېره کې وژل شوي دي.
په سیمه کې وخت په وخت د ناامنۍ خلاف احتجاجي مظاهرې هم کيږي.
شمالي وزيرستان کې په کال 2014م کې د وسله والو ضد د ضرب عضب په نوم عمليات شوي او پوځ دغه سيمه د وسله والو څخه پاکې ګرځولو دعوه کړې وه.
خو په سيمه کې ناامنۍ دوام لري او د پوځي عملياتو له امله کډوال شوي ځينې خلک اوس هم بيرته نه دي ستانه شوي.
پرون د قبايلي ضلعو د نورو پارلیماني غړو او حکومت مخالفه ګوندونو سره ګډې خبري غونډې ته په وينا کې د جنوبي وزيرستان نه د قامي اسمبلۍ غړي زبېر خان وزیر ويلي، "تر ټولو غټه مسله د امن ده چې امن نه وي خلک ژوند نه شي کولی، د 9/11 وروسته ورګډو ټولو قبايلي ضلعو کې ډرون، ناامني، د مشرانو وژنې او بمې چاودنې وشوې، اوس هغه خلک بيا راغلي دي په وزيرستان او نورو سيمو کې هغه خلک بيا قلنګ اخلي، په پرمختيايي کارونو قلنګ اخلي، زه يواځينۍ غوښتنه د امن کوم".
د صوبې وزير اعلا علي امين ګنډاپور د نهې په ورځ اسمبلۍ کې ويلي وو، صوبه کې امن په ځای کولو ته لومړيتوب ورکوي او د پوليسو دپاره يې د فنډونو منظوري ورکړې ده.
هغه ويلي وو، "زمونږ د ټولو نه لوی چېلنج د امن و امان دی، خو د بدقسمتۍ نه مونږ ته پېسې نه مېلاويږې، خو د خپلو وسايلو سره سم مونږ اووه اربه روپۍ پوليسو ته ورکړي دي، په دې د پوليسو دپاره کار شورو شوی دی، او په دې به مونږ پوليس پياوړي کوو چې د ترهګرو مقابله وکړی شي".