پېښور ــــ د خيبر پښتونخوا د ځنګلي حیوانانو د حفاظت ادارې تر مخه د صوبې غريیزې ګليات سيمې څخه درې ورځې وړاندې ورک شوي د نايابه پړانګ درې بچي پنجاب ته کاچاک شوي دي.
د ادارې چيف کنزرويټر يا ايالتي مشر ډاکټر محسن فاروق وي۔او۔اې ډيوه ته د دغه دعوې په اړوند تفصيل ښودلو په وخت وويل، درې ورځې وړاندې د پنجاب او خيبر پښتونخوا په پوله يو ماده پړاګ ووژل شوه او درې بچي يې بيا په غيرقانوني توګه اوچت کړای شول.
د ځنګلي ژویو یا حیواناتو د حفاظت ادارې د مقدمې درج کولو وروسته پلټنې روانې کړې او د ماده پړانګ د وژنې په تور ککړ دوه تنان يې هم ونيول. ډاکټر محسن وويل له نيول شویو تنانو معلومه شوې چې د پړانګ بچي پنجاب ته کاچاک شوي دي:
"موږ په دې اړه پلټنې تيزې کړې دي او زر به کاچاک کوونکو ته ورسېږو، د پړانګ دغه بچي به بيرته را پيدا کوو".
د برفاني او عام پړانګ نسل چې په نړۍ کې نايابه ګرځول شوی او د ځنګلي ژوو د حفاظت د ادارې له لوري د ګليات په غرونو او ناران سره په شا د غرونو په لړۍ کې دغه د پړانګانو د استوګنې ځای ټاکل شوی چې ياده اداره يې څارنه کوي.
ډاکټر محسن وويل د پنجاب صوبې مالداره کورنۍ د نايابه ځناورو په شخصي پنجرو کې د ساتنې شوق کوي او بيا ځکه د دغو پړانګانو د خرڅون لړۍ هم روانه شوې ده.
د ځنګلي ژوند په هکله تحقيق کوونکي وايي د وروستۍ لسيزې په مهال د انسان او ځنګلي ځناورو خپلمنځي جګرې پېښېدو په نتيجه کې هم يو خوا که په لسګونو پړانګانو ته زيان رسېدلی نو بل خوا په انساني ابادۍ باندې د پړانګانو د بريدونو په نتيجه کې هم يو شمېر انسانان وژل شوي او يا ټپيان شوي دي.
دا لومړی ځل دی چې د خيبر پښتونخوا د ځنګلي حیواناتو د حفاظت اداره پنجاب ته د نايابه پړانګانو د غیرقانوني کاچاک دعوه کړې ده.
