په پاکستان کې نن د ګل/ دوشنبې د ورځې [30نومبر] څخه د پوليو ضد څاڅکو پينځه ورځنی کمپاين روان شوی چې پکې به درې کروړه 95 لکه ماشومانو ته د پوليو ضد څاڅکي ورکولی شي.
د وزيراعظم د صحت د چارو مشاور فېصل سلطان پرون د اتوار/ يکشنبې په ورځ په پېښور کې د پوليو کمپاين پرانسته کړې ده.
هغه ويلي پاکستان چې دا وخت د ډېرو چېلنجونو سره مخ دی پکې يو غټ چېلنج د کرونا وبا ده او بل دوی ته د پوليو ضد څاڅکو په وخت د ميندو، پلارانو انکار کول دي.
هغه په ټولو خلکو غږ کړی چې ټولو ماشومانو ته د پولیو ضد څاڅکي ورکړي ځکه چې انکار کول نه يواځې د ماشومانو ژوند د خطر سره مخ کوي بلکې پاکستان هم په نړۍ کې بدناموي.
هغه ويلي د پوليو ضد څاڅکي د صحت نړیوالې ادارې او ديني عالمانو پاک ګرځولي چې دا هيڅ تاوان نه لري.
د پوليو ضد څاڅکي ورکوؤنکي ټيمونه وايي اوس مهال د پوليو ضد څاڅکو ورکولو په وخت دوی ته يوه دا بهانه کولی شي چې د کرونا وبا له امله سکولونه او کاروبارونه تړل کيږي نو بيا چې دا کار کوونکي په کورونوګرځي د دوی نه هم کرونا خورېدی شي.
خو د پوليو ضد پروګرام يا بېړني مرکز د خېبرپښتونخوا مشر عبدالباسط وايي دوی د پوليو ضد څاڅکي ورکوؤنکي ټيمونه د کرونا په اړه تربيه کړي او د کرونا څخه د ځان او نورو د ژغورلو په حکومتي تدابيرو پوره عمل کوي.
وي او ای ډیوه سره په خبرو کې هغه ويلي دا وخت چې د کرونا له امله په ځينو علاقو کې لاک ډاؤن دی دوی به لس ورځې وروسته دلته کمپاين کوي يا به وروسته دا کمپاين وکړی شي.
د صحت د نړيوالې ادارې د پاکستان مشر پليتا مهيپاله په وروستيو کې ويلي ؤ پاکستان د پوليو وایرس د ختمېدو دپاره هڅې روانې کړي او دوی هيله لري چې پاکستان به بل هغه هېواد وګرځي چې دوی يې د پوليو څخه پاک ملک اعلان کړي.
په پاکستان کې سږ کال تراوسه پورې د پوليو د لومړي ډول 81 او دوېم ډول 83 پېښې مخې ته راغلي دي.
په پاکستان کې د پوليو زياتې پېښې په خېبرپښتونخوا، بلوچستان او سیند صوبو کې رپورټ شوي دي، د سرکاري شمېرو ترمخه په بلوچستان کې 23، په خېبرپښتونخوا او سيند کې 22، 22 او پنجاب کې 14 ماشومان د پوليو ښکار شوي دي.
د پوليو د دوېم ډول زیاتې پېښې په خېبرپښتونخوا کې 42 او سيند کې 22 مخې ته راغلي دي.
