د خېبرپښتونخوا په خېبر ضلع کې د تورخم پولې ته نزدې ته چې کوم غر راښويېدلې، افغانستان ته تلونکي مال وړونکي ګاډي ترې لاندې راغلي وو، د غره ملبې لرې کولو عمليات نن په پينځمه ورځ هم دوام لري، او تر اوسه پورې د ملبې څخه اووه مړي راويستل شوي چې ټول د افغانانو وو.
په سيمه کې د ژغورنې په عملياتو بوختې ادارې [رېسکيو1122] د خېبر ضلعې وياند مقصود عالم وي او اې ډیوه ته وويل، نن د وړوکي اختر په ورځ هم د ملبې لرې کولو عمليات دوام لري.
هغه وویل د دوی سره اوس هم د افغانستان يو تن موجود دی چې وايي د هغه يو خپلوان د ملبې لاندې دی.
هغه زياته کړه د پرونه پورې د ملبې څخه اووه مړي راويستل شوي او اووه واړه د افغانستان وو.
هغه وویل، دوی 80فيصده علاقه پاکه کړې خو پرون پرې د پاسه نور غر راوښويېدلی هغې ورته کار نور سېوا کړی وو.
د ادارې ترمخه تراوسه پورې د ملبې څخه 25 ګاډي هم راويستل شوي دي.
ياد غر په هغه ځای راښويېدلی په کومه لاره چې افغانستان ته مال وړونکي ګاډي ځي او څومره ګاډي او کسان چې د غره لاندې راغلي دغه ټول افغانان وو.
په تورخم کې د اپريل د 18مې او 19مې په مينځنۍ شپه کې غر راښويېدلی او د هغې وخت نه بيا د غره لاندې ګېر شوو کسانو او ګاډي راویستو عمليات پېل کړی شوي وو.
د چارواکو په وینا په عملياتو کې د رېسکيو 1122 سره نورې ادارې هم بوختې دي، او د ملبې لرې کولو دپاره د افغانستان د لوري هم نه غټه مشينري راغوښتل شوې ده.
