د خېبرپښتونخوا د وزیراعلا علي امین ګنډاپور په پلارني ټاټوبي ډېره اسماعیل خان تحصیل کلاچي کې ځایي اوسېدونکو د ناامنۍ پرخلاف احتجاج کړی او په علاقه کې د ناامنۍ د پېښو د مخنيوي غوښتنه یې کړې ده.
د کلاچي په لوڼي سیمه کې تیره ورځ د وسله والو او امنیتي ځواکونو ترمینځ په جګړه کې د مارټر ګولې چاودنې له امله یو ماشوم مړ او پینځه نور ماشومان ژوبل شوي وو.
د دغه پېښې تاييد پولیس هم کوي او وايي د پېښې پلټنې یې پیل کړي دي.
احتجاج کوونکو د کلاچي تحصیل هتهاله سیمه کې د ټانک او ډیره اسماعیل خان تر مینځه د ګاډو تګ راتګ لویه لاره بنده کړې او وايي پرون د کلاچي تحصیل په لوڼۍ سیمه کې د وسله والو او امنیتي ځواکونو ترمینځ د ډزو په تبادله کې یو مارټر ګوله د ابادۍ په سیمه کې غورځېدلې چې پکې یو ماشوم مړ او پینځه نور ژوبل شوي دي.
کلاچي د ډیره اسماعیل خان ښار نه نزدې ۵۰ کلومیټره لرې سویل لویديځ سیمه ده او پولې یې د ټانک ضلعې سره لګېدلې دي.
ځايي خلک وايي په دې وروستيو کې علاقه د وسله والو او امنیتي ځواکونو تر مینځ د جګړې میدان جوړ شوی او هر ورځ پکې د ډزو او چاودنو پېښې کیږي چې پکې دواړو خوا یو بل ته د زیات زیان اړولو دعوې کړې دي.
د ځايي خلکو په وینا د ناامنۍ پېښو او پوځي عملیاتو سخت پریشانه کړي او دوی په علاقه کې عادي ژوند نه کوي.
یو احتجاج کوونکي وهاب ګنډاپور وویل چې په تېرو څو میاشتو کې یوازې په کلاچي سیمه کې د ترهګرۍ په پېښو کې لسګونه کسان ووژل شول خو نه د پاکستان مطبوعاتو، نه عدلیې او نه پارليمان د دې خلاف اواز اوچت کړو.
هغه وویل نن دا ماشومان په هدف شوي په پولیسو تاڼو او څوکیو هره ورځ بریدونه کیږي چې له امله په علاقه کې عادي ژوند په ټپه ودرېدلی دی.
د ډیره اسماعیل خان پولیس په علاقه کې د ناامنۍ پېښې تاییدوي او د پولیسو مشر ناصر محمود دفتر چارواکو په وينا، تیره ورځ نزدې شاه خوا ۵۰ وسله والو په علاقه کې د پولیسو په تاڼه برید کړی وو خو پولیسو او د امنیتي ځواکونو په مرسته د برید په شا تمبولی او د ډزو په تبادله کې مارټر ګوله په ابادۍ کې غورځېدلی چې پکې په ابادۍ کې ماشومان لګېدلي دي.
په دې وروستیو کې چې پاکستان په ځانګړې توګه په خېبر پښتونخوا کې دترهګرۍ لړۍ یو وارې بیا چټک شوې او د فرورۍ په اتمه د عامو انتخاباتو په ورځ د کلاچي په لوڼي سیمه کې په یو چاودنه کې پینځه پولیس وژل شوي وو.
کلاچۍ د صوبې اعلا وزیر علي امین ګنډا پور پلارنۍ ټاټوبی دی او عامو انتخاباتو پرمهال د قامي اسمبلۍ څوکۍ د پاکستان تحریک انصاف حمایت یافته کاندید داور کنډي او د صوبې پارلیمان څوکۍ د پاکستان پیپلز ګوند احسان میانخېل ګټلې دي.
تیره ورځ ورسره په پوله په ټانک ضلعه کې ځايي خلکو د ناامنۍ پرضد احتجاجي مظاهره کړې وه او ویلي یې وو ناامنۍ سخت تنګ کړي او خلک په کورونو کې دننه وژل کیږي. مظاهره چیانو په سیمه کې د پوځي قلعې مخې ته پرلت وهلی وو او د امنیت د ټېنګښت غوښتنه کوله.
د سیمې نه ازاد خبریال ناصر داوړ وویل، د صوبې جنوبي ضلعې نه په دې وروستیو کې زیاتې د ناامنۍ پېښې رپورټ کیږي کوم چې د وسله والو یو مضبوط موجودیت څرګندوي.
هغه وویل خلک په خپله راووځي او احتجاجي مظاهرې کوي خو د پاکستان میډیا، پارليمان او عدلیه د پښتنو په وطن کې د روانې ترهګرۍ هیڅ پروا نه کوي.
د نوموړي په وينا د پاکستان ټیلیویژني رسنۍ د کرکټ لوبې او یا بیا یوازې په ملک کې روان سیاسي کړکېچ ښکاره کوي، خو له بده مرغه رسنیو د پښتنو مړو ته کوریج نه ورکوي.
دا ناامنۍ په صوبه کې په داسې حال کې سېوا شوې چې په صوبه کې د پاکستان تحریک انصاف ګوند حکومت دی او د پاکستان پوځي او حکومتي مشرانو پخپله منلې ده چې د عمران خان په تېر حکومت کې طالبانو سره نرمه رویه شوې وه، د هغوی خطرناک قیدیان له زندانونو خلاص کړل شوي وو او نن د دې نتیجي د ترهګرو ډلو د بیا منظم کېدو او د ترهګریزو فعالیتونو د پراختیا په شکل کې مخې ته راغلي دي.
Forum