د خېبرپښتونخوا صوابۍ ضلعه کې تېر ماسخوتن په سټي تاڼه کې چاودنه شوې اور لګېدلی، پېښه کې يو تن وژل شوی او لږ تر لږه 23 نور ژوبل شوي دي. خو چارواکو ویلي، چاودنه د ترهګرۍ پېښه نه ده د شارټ سرکټ يا بجلۍ د کرنټ څخه چاودنه شوې ده.
د صوابۍ ضلعې پوليسو د مشر دفتر چارواکو وي او اې ډيوه ته تاييد کړه، د سټي تاڼه کې چاودنې له امله اور لګېدلی او د تاڼې ودانۍ په بشپړ ډول تباه شوې ده.
د صوابۍ پوليسو او د ژغورنې ادارې [رېسکيو 1122] ترمخه، د چاوندنې له امله د 23 پورې پولیس اهلکار او نور کسان ژوبل شوي دي.
د صوابۍ ضلعې پوليس مشر [ډي پي او] هارون رشید د پېښې په اړه مطبوعاتو سره خبرو کې ویلي، دا د ترهګرۍ پېښه نه ده، د دوی سره په تاڼه کې مال مقدمه يا ځينې مواد چې قضيې یې روانې وې، په کمره کې شارټ سرکټ شوی او د هغې نه چاودنه شوې ده.
د پوليس افسر په خبره، پېښه کې د غفلت کوونکو پوليسو ضد به کارروايي کولی شي.
د سرچینو ترمخه، د تاڼې سره څنګ ته ودانيو ته هم زيان اوښتی دی.
د ژغورنې ادارې رېسکيو 1122 ويلي، د تاڼې په پېښه کې 23 ژوبل کسان روغتون ته منتقل کړل شوي چې پکې د دوو روغتيايي حالت خطرناک ښودل شوی وو.
ورووسته ويل شوي، په ژوبلو کې يو تن سراج په باچا خان روغتون صوابۍ کې ساه ورکړې ده، او د اووه تنو په روغتون کې درملنه روانه ده.
ویل شوي، د شپې نزدې 11 بجې په تاڼه لګېدلی اور مړ کړل شوی دی.
تېر کال د اپرېل په میاشت کې دغه ډول پېښه د خېبرپښتونخوا سېلګرۍ سیمې سوات سي ټي ډي پوليس تاڼې کبل کې شوې، چاودنو کې د 17 پورې کسان وژل شوي او 50 نه زيات ژوبل شوي وو.
هغه وخت د خېبرپښتونخوا پولیس مشر اختر حیات خان د چاودنې په اړه ويلي وو، چاودنې د سي ټي ډي په پخوانۍ تاڼه کې شوې وې.
هغه ویلي وو، د تاڼې په مالخانه کې موجود ګوله بارود چې په عدالتونو کې یې قضیې روانې وې، په ابتدايي پلټنو کې ښکاري چې په دغو موادو کې یو څيز چاودلی او بيا نورې چاودنې شوې وې.
هلته هم پوليسو د ترهګرۍ پېښه کېدل رد کړي وو.
Forum