په افغانستان کې د غزني ولایت ځایي چارواکي وایي چې د تیرې یوې هفتې په لړ کې، د پوځي عملیاتو په نتیجه کې له دېرشو زیات پاکستاني وگړي وژل شوي دي.
د غزني د والي ویاند، عارف نوري، امریکا غږ ډېوه ته وویل چې تیره شپه د افغانستان خاصو ځواکونو یا سپیشل فورس چې د خارجي ځواکونو مرسته هم ورسره وه، د غزني د اندړو په ولسوالۍ کې ۴٢ طالبان ووژل چې په کې شاوخوا دېرش تنه یې پاکستانیان و.
ښاغلي نوري زیاته کړه چې په دې عملیاتو کې د طالبانو ١١ کسان ژوندي هم نیول شوي چې درې تنه یې د پاکستان شهریت لري.
د تیرې یکشنبې/اتوار په ماښام هم غزني ښار ته نږدې د سفنده په نوم یو کلي کې د طالبانو او افغان کومانډو یا خاصو ځواکونو ترمنځ جگړه وشوه چې له امله یې، د افغانستان د دفاع وزارت په وینا، ١١ افغان طالبان او څلور پاکستانيان ووژل شول. په وژل شویو کې یو یې ساجد خان او بل یې اسدالله وزیر نومیده چې ویل کیږي د پاکستان شهریت یې درلود.
پخوا هم افغان چارواکو په کراتو دا ویلي چې د طالبانو په لیکو کې پاکستاني تندروان هم جنگیږي، خو پاکستان او پخپله د طالبانو ډله دا خبره نه مني. پاکستان په دې وروستیو کې د سرحداتو د کنټرول لپاره، د گډې پولې پر زیاترو برخو اغزن تار هم ولگاوه.
پر دې سربیره، پاکستان هم پر افغانستان دا تور لگوي چې گني د تحریک طالبان پاکستان جنگیالي د افغانستان له خاورې پر پاکستاني پوځیانو حملې کوي او بیرته د افغانستان خاورې ته تښتي. مگر افغان حکومت هم دا دعوې ردوي.
که څه هم د امریکا او طالبانو ترمنځ د سولې مذاکراتو ته لا امیدونه شته، مگر افغانستان کې هره ورځ جنگ جگړې روانې دي. طالبانو د الفتح په نوم او حکومت د خالد په نوم پوځي عملیات پیل کړي دي.
د افغانستان د دفاع وزارت په یو بیان کې ویلي چې په میدان وردگ، فراه، ارزگان، او کندهار ولایتونو کې یې ١١۴ طالبان وژلي او زخمیان کړي دي، مگر دا نه ده معلومه چې دومره مرگ ژوبله په یوه ورځ کې طالبانو ته اووښتې که په څو ورځو کې.
طالبانو هم دعوه کړې چې په پکتیکا، پکتیا، لوگر، بغلان، او کندز ولایتونو کې یې حکومتي پوځیانو ته د سر زیانونه اړولي او پوځي گاډي یې ویجاړ کړي دي.
یاده دې وي چې د دواړو اړخونو لخوا د تلفاتو کومې شمیرې چې ورکول کیږي، د کومې خپلواکې سرچینې لخوا یې تایید نه شي کیدای.
