اسرایل غزه ته د امدادي سامانونو لیږل تړلي چې په حماس د اوربند نوي تړون لپاره فشار زیات کړي

اسرایل ویلي چې د غزه پټۍ ته تلونکي ټول امدادي سامان وړونکي ګاډو لاره بندوي او د ٫٫اضافي نتیجو٬٬ خبرداری یې هم ورکړی که چرې د امریکا لخوا ترهګره ګرځول شوي وسله والې ډلې حماس د امریکا لخوا منل شوی د اوربند نوی تړون عملي نه کړو.

حماس وسله والې ډلې بیا په اسرایل تور لګولی چې د اوربند نازکه تړون په شاه بوځي او زیاته کړې یې ده چې غزه ته د امدادي سامانونو تړل په روانه ډزبندې باندې ٫٫ جنګي جرم، نامناسبه او ارزانه برید٬٬ دی.

د اسرایل او حماس تر منځه د ډزبندۍ لومړی پړاو د خالي/ شنبې په ورځ ختم شوی چې پکې د بشري مرستو زیاتول هم شامل دي. دواړه ډلې به د د اوربند په دویم پړاو خبرې کوي چې پکې د حماس لخوا د پاتې اسرایلي یرغمالیانو خوشي کول او په ځواب کې د غزه د یو شمېر برخو نه د اسرایل وتل شامل دي.

یو اسرایلي چارواکي د نوم نه ښودلو په شرط ویلي چې غزه ته د امدادي سامان تړلو فیصله د امریکا صدر ډانلډ ټرمپ انتظامیې سره په مشوره شوې ده. خو تر اوسه د امریکا لخوا د اسرایل په دغه فیصله کوم نظر نه دی راغلی.

د جنورۍ ۱۹مې نېټې راپه دیخوا د کله نه چې د اسرایل او حماس تر منځه ډزبندي شوې، غزه ته د امدادي سامانونو سوونو ټرکونه داخلیږي. تر اوسه دا نه ده معلومه چې د امدادي سامانونو تړلو به په سمدستي توګه کوم اثر وي.

د جنورۍ په ۱۹ نېټه د اسرایل او د حماس ډزبندي د شروع کېدو راهسې حماس ۲۵ یرغمالان او اسرایل د ۱۱۰۰ نه زیات فلسطیني قېدیان ازاد کړي دي.

د طبي امداد نړیوالې ادارې انټرنېشنل کميټي اف دي رېډکراس په ټولو فریقېنو غږ کړی چې د قېدیانو او د یرغمالانو تبادله دې په باوقار او د شخصي انداز کې وکړی شي.

په اسرایل کې فلسطیني قېدیان د ترهګرو په څېر لیدل کېږي چې د ملکي خلکو ا د اسرایلي ځواکونو خلاف د پرتشدد حملو په سر نیول شوي دي.

د فلسطینیانو دپاره د قېدیانو ازادي انصاف او د اسرایل خلاف د مزاحمت د علامت په توګه لیدل کېږي.
اسرایل او حماس دواړو په یو بل د ډزبندۍ د خلاف ورزۍ الزامات لګولي دي خو د دې باوجود هم د امن دا لوظنامه په ځای ده.

د کال ۲۰۲۳ د اکتوبر په اوومه نېټه په اسرایل د حماس د حملې په جواب کې اسرایل په غزه کې د حماس خلاف عملیات شروع کړل او لوظ یې وکړو چې حماس به ختموي. د حماس په حمله کې په اسرایل کې تر ۱۲۰۰ پورې کسان وژل شوي او ۲۵۰ نور کسان حماس یرغمال ونیول.

په غزه کې د جنګ د لاسه د غزه د صحت وزارت وايي د ۴۸۰۰۰ نه زیات کسان وژل شوي دي. ملګري ملتونه وايي دا شمېرې د باور وړ دي. اسرایل وايي په غزه کې تر ۱۷۰۰۰ پورې وسله وال يې هم وژلي دي.