د خېبر پښتونخوا په لکي مروت سیمه کې د ناامنۍ په دوو جلا پېښو کې یو پولیس اهلکار او یو وسله وال کمانډر وژل شوی دی.
د لکي مروت پولیسو په وینا، لومړۍ پېښه د نورنګ تحصیل په عالمي کلي کې شوې ده. پولیسو ته استخباراتي معلومات ترلاسه شوي وؤ چې د کلي په یوه سیمه کې وسله وال موجود دي.
پولیس وایي کله چې امنیتي ځواکونه سیمې ته ورسېدل وسله والو پرې ناتاره ډزې پیل کړې.
د پولیسو په وینا د څو ساعتونو د ډزو له تبادلې وروسته یو وسله وال وژل شوی چې په سیمه کې د وسله والو د کمانډر ملا محمد غلام په نوم پېژندل شوی دی.
پولیس وایي چې وژل شوی کمانډر په هدفي وژنو، بمي بریدونو، او د قلنګ غوښتنو په پېښو کې پولیسو او د ترهګرۍ ضد محکمې سي ټي ډي ته مطلوب و.
د پولیسو لخوا په دې پېښه کې د امنیتي ځواکونو د زیان په اړه کوم تفصیل نه دی ورکړل شوی.
په بله پېښه کې چې د لکي مروت په مستي خېل سیمه کې شوې.
دغلته د عبدالرحمان په نوم یو پولیس عسکر چې په بنو کې یې ډيوټي لرله اؤ خپل کور ته په رخصتۍ ورغلی ؤ ، د نامعلومه وسله والو په برید کې وژل شوی دی.
د پولیسو په وینا، عبدالرحمان د ماسخوتن مونځ نه وروسته خپل کور ته روان ؤ چې نامعلومو کسانو پرې ډزې وکړې او په ځای یې ووژلو.
په دې وروستیو کې په لکي مروت کې د ناامنۍ پېښې زیاتې شوي دي او په تېرو درېوؤ ورځو کې دا دویم پولیس اهلکار دی چې په هدفي برید کې وژل کېږي.
پولیسو د نامعلومه وسله والو په ضد مقدمه درج کړې او د پېښې پلټنې یې پیل کړې دي.
تراوسه د دې پېښې ذمه واري چا پر غاړه نه ده اخستې.
Forum