د امریکې او د مېکسیکو په سرحد د غېرقانوني کډوالو د ګرفتاریو شمېره د فېبرورۍ په میاشت کې تر رېکارډ کچې پورې کمه وه. د دې خبرې تصدیق د ډپارټمنټ اف هوم لېنډ سېکیورټي، ډي اېچ اېس، او دوو نورو سرچینو روېټرز خبري ادارې ته کړې دی.
د ډي اېچ اېس ترجمانې ټرېشیا مېکلالېن وویل د امریکې د سرحد د تحفظ ځواک يواېس بارډر پېټرول دلاسه د امریکې په جنوبي سرحد د غېرقانوني کډوالو د ګرفتاريو شمېره به دا میاشت ۸۵۰۰ ته ورسېږي. دوو نورو سرچینو وویل د ګرفتاریو دغه شمېره به تر رېکارډ ټر حده پورې کمه وي.
د ريپبلېکن پارټۍ صدر ډانلډ ټرمپ په ۲۰ جنورۍ د صدارت دویمه دوره د شروع کولو راهسې يې د غېرقانوني کډوالو خلاف اقدامات شروع کړي دي.
د غېرقانوني کډوالو خلاف د ټرمپ په اقداماتو کې په سرحد کډوالو ته په پناه ورکولو مکمله پابندي لګول شوې ده او په سرحد امنیت د ښه کولو دپاره پوځ د مرستې دپاره طلب کړی شوی دی.
د شهري حقونو تنظیم امېرېکن سېول لېبرټيز یونین دا میاشت د ټرمپ حکومت د امیګرېشن د تګلارو په سر مقدمه شروع کړې وه او دا دریځ يې خپل کړی و چې کډوالو ته په پناه پابندي د امریکې د قانون او د نړیوالو معاهدو خلاف ورزي کوي.
ټرمپ د مېکسیکو او د مرکزي امریکې د ځینو ملکونو سره معاهدې کړې چې د امریکې نه ډيپورټ شويو کډوالو ته ته به ځای ورکوي او ځینې کډوال يې په ګوانټامو بی کې حراستي مرکز ته لېږلي دي.
د یو اېس بارډر پېټرول د کال ۲۰۰۰ راهسې په سرحد د ګرفتاریو شمېره رېکارډ کوي. په پوله د ګرفتارۍ تر ټولو کمه شمېره د کال ۲۰۱۷ د اپرېل په میاشت کې وه چې د ټرمپ د حکومت په وړمبۍ دوره کې ۱۱۱۲۷ نیول شوي وو.
په کال ۲۰۱۷ کې د ټرمپ د صدارت څلور کلنه وړمبۍ دوره د شروع کېدو وروسته په سرحډ د ګرفتاریو شمېره کمه شوې وه خو د دې وروسته ګرفتارۍ بیا زیاتې شوې وې.
د امریکې د حکومت د شمېرو ترمخه د ۲۰۲۴ د فېبرورۍ په میاشت کې په جنوبي سرحد ۱۴۱۰۰۰ غېرقانوني کډوال او د جنورۍ په میاشت کې ۲۹۰۰۰ غېر قانوني کسان نیول شوي وو.
Forum