د "تاج محمدخان او نمرو"د اولسي قيصې ترڅنګ د ګڼو نورو داستانو او شاعرۍ خالق د مومندو ضلعې عوض خان مومند د ۷۵ کالو په عمر کې په حق رسېدلی دی.
عوض خان د بره مومندو په موسی خېلو کې زېږېدلی ځواني يې هم په خپل کلي کې تېره کړې خو وروستو د روزګار په غرض پېښور او بيا د پنجاب صوبې راولپنډۍ ته تللی او هم هلته مېشت شوی ؤ.
ارواښاد پرون د شورو، چهارشنبې په ورځ د ورپېښې ناروغۍ له امله په راولپنډۍ ښار کې ساه ورکړې ده.
د هغه يوه جنازه په پېنډۍ او بله نن د زيارت په ورځ په مومندو کې د هغه په پلارني کلي کې ادا کيږي او هم هلته به خاورو ته سپارلی شي.
عوض خان په خپل ژوندانه وي او ای ډيوه سره په يوه مرکه کې ويلي ؤ چې هغه د ۱۶ کالو په عمر کې د تاج محمد خان او نمرو د قيصې نه د شاعرۍ پېل کړی ؤ د هغه يو شمېر نورې ليکلې سندرې هم مشهورې شوي او ګڼو سندرغاړو زمزمه کړي دي.
لکه د هغه يوه دغه سندره چې "د پورې کلي د ملک لور مې په ګودر کې وليدله... د راډ په شانتې په جينکو کې سپينه سپينه بلېدله".
د اروښاد قيصې او سندرې د پښتو ژبې نامتو سندرغاړو سردارعلي ټکر او وحيد ګل استاز ترڅنګ ګڼو نارينه او ښځينه سندغاړو ويلي دي.
که څه هم عوض خان چاپ کتاب نه درلود خو د هغه ډېره شاعري په عامو پښتنو کې مشهوره او خلکو ته زباني ياده ده.
د مومندو سره تعلق لرونکی شاعر او خبريال حېران مومند وايي د عوض خان په شاعرۍ کې اولسي او خوږ رنګ ؤ، په ساده او عامو الفاظو کې به يې اولس ته خپل غږ رسوؤ.
د عوض خان اشنايان وايي په پښتو اوپښتنو مئين دا اولسي شاعر د خپل عمر په وروستي وخت کې د معاشي تنګسيا او ناروغۍ سره مخ ؤ.
خو د ارواښاد د خپل اولس سره د مينې اندازه او پښتنوته په ورپېښو کشالو او ناکړدو د ياد دا حال ؤ چې هغه دغه څرګندونې په خپله شاعرۍ کې ځای په ځای کړي دي، لکه هغه وايي،
"ما خوب ليدلی چې نتيجه به یې ډېره زر وخيژي... د پښتو ويلو نه ډېر خلک منکر وخيژي".
د ارواښاد دغه شعر تاسو په ډيوه رېډيو بيا بيا اورئ.
