پاکستاني چارواکي وايي، د دغه هېواد د امنیتي چارو سلاکار جنرال ریټایرډ ناصر جنجوعه به سبا (د خالي یا شنبې په ورځ) افغانستان ته سفر وکړي.
د پاکستاني چارواکو لخوا په یو خپور شوي بیان کې راغلي دي، چې نوموړی به له افغان چارواکو سره د دواړو هېوادونو ترمنځ په موجوده تاوتریخوالي او د ترهګرۍ پرضد په روانې مبارزې باندې خبرې وکړي.
افغانستان ته د لوړ پوړي پاکستاني امنیتي چارواکي دغه سفر وروسته له هاغې کیږي چې په کابل کې افغان ولسمشر اشرف غني په دې وروستیو کې د کابل پروسې په کانفرانس کې یوځل بیا په طالبانو غږ وکړ چې د سولې خبرو ته دې کښېني.
اشرف غني دا هم وویل چې طالبان به د یو سیاسي ګوند په توګه ومني او د سولې په اړه له پاکستان سره د دولت په کچه هر اړخېزو خبرو ته چمتو دی.
کابل ته د دغه لوړ پوړي پاکستاني چارواکي سفر د افغانستان د ملي امنیت د سلاکار محمد حنیف اتمر په بلنه ترسره کېږي.
