پاکستان او روس د سه شنبې یا نهې په ورځ موافقه کړې ده چې د ترهګرۍ او مخدره موادو پر ضد مبارزه کې به خپلې دوه اړخیزه همکارۍ لا پسې پراخوي.
د پاکستان د سرکاري ریډیو د رپورټ له مخې د سه شنبې په ورځ د پاکستان د کورنیو چارو د وزیر محسن نقوي او په اسلاماباد کې د روس د سفیر البرټ پي خوریف ترمنځ لیدنه کې پاکستان او روسیې د ترهګرۍ ضد خبرو اترو د بیا فعالولو پرېکړه هم کړې ده.
څېړونکي وایي که څه هم پاکستان د امریکا او چین ترمنځ د متوازن سیاست ساتلو هڅه کوي، خو له روسیې سره یې د اړیکو پراخول د سیمهییزې جیوپولیټیکي اړتیاوو برخه ده.
د پاکستان د کورنیو چارو د وزارت د اعلامیې له مخې اسلام اباد کې د داخله وزیر محسن نقوي اؤ د روس د سفیر تر منځ لیدنه کې په دوه اړخیزه اړیکو او د ګډو ګټو په موضوعاتو په تفصیل سره خبرې اؤ غور شوی دی.
د پاکستان دولتي میډیا ویلي چې دواړو لوریو د متقابلو هیتونو د تبادلې پر زیاتوالي هم موافقه وکړه، ترڅو دوه اړخیزې اړیکې نورې پیاوړې شي.
د اعلامیې له مخې د ملاقات په مهال د روس سفیر د پاکستان چارواکي مسکو او سایبریا ته د نشهيي موادو پر ضد د روزنیزو پروګرامونو لپاره دعوت کړل.
د غونډې په مهال د پاکستان د کورنیو چارو وزیر وویل چې ترهګري یو نړیوال چلینج دی او د دې پر ضد مبارزه کې ګډې هڅې اړینې دي.
نوموړي د روس سره د پاکستان د اړیکو د لا پیاوړتیا ژمنه بیا تکرار کړه او ټینګار یې وکړ چې د دواړو هېوادونو ترمنځ بیلابیلو برخو کې د همکارۍ پراخه فرصتونه موجود دي.
تېر کال د اکتوبر په میاشت کې، د پاکستان وزیراعظم شهباز شریف اسلام اباد ته د شانګهای د همکاریو د سازمان د ۲۳مې سرمشریزه غونډه کې ګډون لپاره راغلي د خپل روسي سیال میخایل میشوستین سره هر اړخیزه خبرې اترې کړې وې.
دواړو مشرانو په دغه موقعه د دوه اړخیزې همکارۍ ټول اړخونه څېړلي وؤ او یادونه یې کړې وه چې په تېرو دوو لسیزو کې د پاکستان او روسیې اړیکې مثبت لوري ته تللې دي.
شهباز شریف له روسیې سره د سیاسي، اقتصادي او دفاعي همکاریو د پراخولو ژمنه کړې وه هغه همداراز د پاکستان د بریکس غړیتوب لپاره د روسیې د ملاتړ مننه کړې وه او ویلي یې وؤ چې دا د نړیوالو همکاریو په لور یو مهم ګام دی.
د پاکستان او روسیې اړیکې له تاریخي پلوه له لوړو ژورو سره مخ پاتې شوي خو څېړونکي وایي، په دې وروستیو کلونو کې دواړه هېوادونه د سیاسي، اقتصادي او دفاعي همکارۍ پر لور د پرمختګ هڅه کوي.
د سړې جګړې پر مهال، د پاکستان او پخواني شوروي اتحاد ترمنځ اړیکې خړې پړې وې، ځکه چې پاکستان د امریکا نز دې اتحادي ؤ او د شوروي ضد بلاک برخه ګڼل کېده.
دا اختلافات هغه وخت نور هم زیات شول، کله چې پاکستان افغانستان کې د"جهاد" په نامه د روانې جګړې پر مهال د "مجاهدینو" ملاتړ وکړ، چې شوروي اتحاد ته یې لوی سرخوږی جوړ کړی و.
د روس اؤ پاکستان په اړیکو ژور نظر لرونکی لیکوال اؤ څېړنکار پروفیسر محمد اسلم وایي د شوروي اتحاد تر زوال وروسته، د پاکستان او روسیې اړیکو کې یو تدریجي بدلون راغلی دی اؤ د ۲۰۱۰مې لسیزې له پیل راهسې، دواړو هېوادونو د سیاسي او اقتصادي همکاریو پر لور ګامونه اخستي دي.
ډیوه سره خبرو کې هغه وایي روسیې پاکستان ته د ګیس پایپ لاین د جوړولو وړاندیز وکړ، چې د پاکستان د انرژۍ بحران کمولو لپاره مهم ګڼل کېده. همداراز، د ترهګرۍ ضد جګړې او د سیمهییز امنیت د ټینګښت لپاره، پاکستان او روسیې ګډ پوځي مشقونه هم پيل کړل.
پروفیسر اسلم وایي چې په دفاعي برخه کې هم د پاکستان او روسیې همکارۍ اوس پټ پناه خبره نه ده .
"روس پاکستان ته د MI-35 جنګي هیلي کاپټرې ورکړي دي، او دواړه ملکونه د وسلو، پوځي تربیت او د انټلیجنس مرستو زیاتولو ته مایله دي. د ۲۰۱۸م کال نه د دواړو ملکونو پوځونو شریک جنګي مشقونه هم کړي،اؤ دا هر څه ښیي چې ماسکو اؤ اسلام اباد اوس په یو بل باور کوي"
د څېړونکو په اند روس غواړي د پاکستان له لارې د خپلو تجارتي لارو پراختیا ته وده ورکړي، او اسلامآباد ته د طبیعي ګازو د صادرولو امکانات هم ارزوي. د شمال ـ جنوب ګیس پایپ لاین پروژه، چې د روسیې په مالي مرسته ترسره کیږي، د دې اړیکو د پراخېدو یوه مهمه بېلګه ګڼل کیږي.
پروفیسر اسلم وایي اسلامآباد هڅه کوي چې له مسکو سره متوازنه اړیکه وساتي، ترڅو د لوېدیځ فشارونه هم په نظر ونیسي او د اقتصادي همکاریو امکانات هم له لاسه ور نه کړي.
هغه وایي پاکستان له سخت اقتصادي بحران سره مخ دی اؤ غواړي چې د روسیې له ارزانه انرژۍ ګټه پورته کړي، او همدې هدف ته په کتو یې له مسکو څخه د تیلو د وارداتو هڅې هم کړې دي.
د هغه په خبره ،که څه هم پاکستان د امریکا او چین ترمنځ د متوازن سیاست ساتلو هڅه کوي، خو له روسیې سره یې د اړیکو پراخول د سیمهییزې جیوپولیټیکي اړتیاوو برخه ده.
Forum