د امریکې خارجه وزیر مارکو روبیو د ګل ، دوشنبې، په ورځ وویل د بهرني امداد دپاره د امریکايي ادارې یو اېس ای ايي ډي د اصلاحاتو عمل سر ته ورسوول شو، د ادارې ۸۳ فیصد پرواګرامونه ختم کړی شوو او سټېټ ډپارټمنټ یا خارجه وزارت به د یواېس ای ايي ډي د باقې پاتې پروګرامونو سرپرستي کوي.
روبیو دا اعلان د سوشل میډیا په وېب پاڼه اېکس وکړو. د بهرني امداد او ترقۍ دپاره په امریکايي اداره کې د تاریخی بدلون شروعات د ډپارټمنټ اف ګومنټ اېفېشېنسي یا ډوژ د ارب پتې سرمایه دار ایلان مسک په مشرۍ کې شوي وو.
امریکايي صدر ډانلډ ټرمپ د مسک تقرري کړې ده. مسک وايي د حکومت حجم او حکومتي اخراجات به کموي.
روبيو د ډوژ او د دې محکمې د عملې شکریه ادا کړه چې دهغه په قول په محنت او زیار يې یواېس ايي ډي کې تاریخي اصلاحات وکړل.
د جنورۍ په ۲۰ نېټه د صدارت سوګند د پورته کولو وروسته ټرمپ یو صدارتي امر دستخط کړو چې بهرنی امداد يې منجمد کړو او د ملک نه بهر د امریکايي امداد او د ترقیاتي کارونو د جاج اخیستلو امر یې وکړو.
د ټرمپ دریځ دی چې د یو اېس ای ايي ډي دلارې کېدونکی زیاتره بهرنی امداد د پېسو ضایع کېدل دي او لېبرل یا ازاد خیالې مفکورې ته وده ورکوي.
روبیو د ګل، دوشنبې، په ورځ په خپل پوسټ کې وویل د یواېس ای ايي ډي بیا کتنه په رسمي ډول ختمېږي او د ادارې د ۶۲۰۰ څخه ۵۲۰۰ پروګرامونه ختم کړی شوي دي.
روبیو وویل سلګونه بېلینونه ډالر په داسې پروګرامونو خرچ کېدل چې د امریکې بنیادي قومي مفاداتو ته د ګټه رسوولو په ځای يې په ځینو موقعو دې مفاداتو ته نقصان رسوولو.
روبيو وویل اراده لري چې د کانګرس سره په صلاح مشوره د یواېس ای ايي باقي پاتې ۱۸ فیصد پروګرامونه وساتل شي او انتظام به يې په زیات موثر انداز کې د سټېټ ډپارټمنټ د سرپرستۍ دلاندې کېږي.
د ډېموکرېټېک پارټۍ د کانګرس غړي او ځینې نور د کانګرس په منظور شويو پېسو چلېدونکي د یواېس ای ډي پروګرامونو بندېدل غېر قانوني ګام بلي، وايي کانګرس باید دا ډول ګام منظور کړي.
د ټرمپ د امر نه په وروستیو هفتو کې مسک او د ټرمپ د حکومت بل چارواکي پيټ مراکو د یواېس ای ايي ډي بهر ګمارل شوي د عملې غړي بېرته راغوښتې او يا يې د دندې څخه لرې کړي دي، شپه په شپه یې د یواېس ای ايي ډي د پېسو ادایګي ودرولې د زرګونو په شمېره کې يې د امدادي او د ترقیاتي ټېکې ختم کړې دي.
د یواېس ای ايي ډي په اړه د حکومتي اقداماتو خلاف په عدالتونو کې ځینې مقدمې هم شروع کړی شوي دي.
Forum