فلسطیني مسلح ډلې حماس، چې امریکې ترهګر تنظیم ټاکلی دی، د زیارت، پنجشنبې، په ورځ يې وویل تنظیم ته د صدر ډانلډ ټرمپ ګواښونه د اسرایل حوصله افزايي کوي چې په غزه کې د اور بند د معاهدې نه په شا شي.
صدر ټرمپ ویلي که چېرې په غزه کې نیول شوي باقي پاتې ټول یرغمالان ازاد نه کړی شول نو حماس به يې دروند قیمت ادا کوي.
ټرمپ د سوشل ميډیا په خپله وېب پاڼه ټروت سوشل حماس په مخاطب کولو وویل ټول یرغمالان دې اوس په سمدستي ډول ازاد کړی شي، د هغه کسانو مړي دې بېرته ورکړی شي چې "تاسو قتل "کړي که نه وي نو "دا معامله به د ستاسو دپاره ختمه وي."
ټرمپ زیاته کړه چې دا کار سر ته د رسوولو دپاره اسرایل ته د ضرورت ټول شیان ورلېږي. امریکايي صدر وویل که حماس د هغه خبره نه مني نو د ډلې یو غړی به هم محفوظ نه وي.
د اسرایل او د حماس د ډز بندۍ وړمبۍ مرحله د خالي، شنبې، په ورځ ختمه شوه. په دې مرحله کې حماس ۳۳ اسرایلي یرغمالان او اسرایل د خپل قېد نه قریباً ۲۰۰۰ فلسطینیان ازاد کړل.
وایټ هاوس د شورو، چهارشنبې، په ورځ تصدیق وکړو چې امریکې د حماس سره نېغ په نېغه مذاکرات کړي دي. په اړه معلومات لروونکو سرچینو وویل د خبرو اترو توجه په امریکايي یرغمالانو وه چې په غزه کې بندي ساتل شوي دي.
د وایټ هاوس ترجمانې کېرولاین لېوېټ مذاکرات د امریکايي ولس دپاره د صحیح کار په غرض د نیک نیتۍ کوښښ وبللو.
د اسرایلي وزیراعظم بېنجمن نېټن یاهو دفتر په یو بیان کې وویل اسرایل امریکې ته حماس سره د نېغ په نېغه مذاکراتو په اړه د خپل دریځ اظهار کړی دی.
د اسرایل او د حماس جنګ د ۲۰۲۳ د اکتوبر په اوومه نېټه په اسرایل د حماس د حملې نه شروع شو. د حماس په حمله کې په اسرایل کې تر ۱۲۰۰ پورې کسان ووژل شوو او تر د ۲۵۰ پورې نور کسان حماس یرغمال نیولي وو.
د حملې په جواب کې اسرایل په غزه کې د حماس خلاف جنګ شروع کړو. د غزه د صحت وزارت ترمخه په سیمه کې د ۴۸۲۰۰ نه زیات کسان وژل شوي دي. اسرایل وايي په غزه کې په وژل شویو کسانو کې ۱۷۰۰۰ وسله وال هم شامل دي. د جنګ دلاسه د غزه په پراخه کچه علاقې تباه شوي او د سیمې د دوه اشاریه درې مېلین ابادۍ زیاتره برخه بې کوره شوې وه.
یادونه: د دې خبر معلومات د ای پي، ای اېف پي او د روېټرز خبري ادارو نه اخیستل شوي دي
Forum