په افغانستان کې د سیاسي کړکیچ ختمولو او طالبانو سره د امن لوظنامه پرځای ساتلو دپاره د امریکې خارجه وزیر مایک پامپېیو د افغانستان دوره وکړه.
د ګل، دوشنبې، په ورځ کابل ته د مایک پامپېو د سفر د وړاندې څخه اعلان نه و شوی.
د اسلام اباد نه د وي او ای د انګریزۍ څانګې خبریالې عایشه تنظیم په خبر رپورټ کې لیکلي چې افغانستان ته د مایک پامپېیو د تګ مقصد د افغان صدر اشرف غني او عبدالله عبدالله ترمنځ سیاسي اختلاف هوارول وو.
رپورټ وايي د دواړو افغانانو ترمنځ اختلافات تېره میاشت شوي د امریکې او طالبانو د سولي معاهده د خطر سره مخامخ کوي.
د افغانستان د انتخاباتو کمیشن د تېرکال د سپټمبر په میاشت کې شویو صدارتي انتخاباتو کې اشرف غني بریالی بللی دی او هغه د خپلې چوکۍ سوګند هم پورته کړی دی.
خو عبدالله عبدالله دعوه کوي چې په ووټونو کې په پراخه کچه درغلي شوي، انتخابات هغه ګټلي او د صدارت د سوګند پورته کولو یې ځان له دستوره هم کړې ده.
د امریکې د خارجه وزارت یو چارواکي د وي او ای انګریزۍ څانګې ته ویلي که چېرې د اشرف غني او عبدالله عبدالله ترمنخ لانجه زر حل نشي نو د طالبانو سره د سولې معاهده د خطر سره مخامخ کېدلی شي.
رپورټ وايي مایک پامپېیو په داسې حال کې هم افغانستان ته ورغلوچې په نړۍ کې د کرونا وایرس د خوریدو مخه نیولو دپاره په سفرونو بندیزونه لګول کیږي او په افغانستان کې د امن دپاره د امریکې استازی زلمی خلیلزاد د وړاندې څخه په کابل کې دی چې افغانستان کې موجوده سیاسي مسله حل کړي.
څیړونکي وايي په افغانستان کې د بېلا بېلو قومونو ترمنځ د اختلافاتو تاریخ ته په کتنه دا ویره ده چې د اختلافاتو په دې فضا کې به امنیتي ادارې وویل شي او یا به هم ټولنه وویشل شيږ
د امریکې د خارجه وزارت یا سټېټ ډپارټمنټ چارواکي وویل چې امریکا په افغانستان کې یو داسې حکومت غواړي چې اشرف غني او عبدالله عبدالله دواړو دپاره د قبولولو وړ وي.
امریکايي چارواکي وویل په افغانستان کې موجوده سیاسي مسلې له امله د طالبانو په شمول بېن الافغاني مذاکرات ځنډېدلي دي. "پکار ده چې بېن الافغاني مذاکرات څو ورځې وړاندې شروع شوی وی خو د دې جګړې لاسه نه دي شوي."
امریکايي چارواکي وویل افغان فریقین په دې نه دي راضي شوي چې د طالبانو سره په بېن الافغاني مذاکراتو کې به څوک کښېني.
په قطر کې د امریکې او طالبانو ترمنځ لاس لیک شوي معاهدې د مخه به د افغانانو یو پلاوی چې پکې به د مختلفو سیاسي طبقو، اقلیتونو او مېرمنو نمایندګان شامل وي، طالبانو سره به د امریکايي ځواکونو د انخلا نه وروسته د افغانستان د اینده په موضوع خبرې کوي.
د سټېټ ډپارټمنټ چارواکي وویل د بین الافغاني مذاکراتو دپاره افغانان لا د داسې خلکو په فهرست نه دي متفق شوي چې امریکایانو او طالبانو ته د منلي وړ وي.
په عین حال کې د افغان حکومت او طالب استازو د سکايپ دلارې په لومړي ځل د قیدیانو د تبادلې په موضوع اتبدايي خبرې وکړې.
زلمي خلیلزاد وویل دواړو فریقېنو په تفصیلي ډول اهمې خبرې وکړې.
