د امریکایي کانګرس غړو جو ولسن اؤ اګست پلګر د امریکې د بهرنیو چارو وزیر مارکو روبیو ته یو لیک استولی اؤ په هغه یې ټینګار کړی چې د پاکستان د پخواني وزیراعظم اؤ د تحریک انصاف ګوند د باني عمران خان د خلاصولو لپاره د پاکستان سره خبرې وکړي.
تر دې وړاندې هم جو ولسن د تېرو څو اونیو په مهال په ایکس رسنۍ خپلو پوسټونو کې څو کرته د عمران خان د خوشې کولو غوښتنې کړې دي.
عمران خان د اګست ۲۰۲۳م راهسې په ګڼو مقدمو کې ګرفتار اؤ په اډیاله زندان کې پروت دی چې جو ولس یې نیونه 'سیاسي' بولي.
جو ولسن د استازو د ایوان د بهرنۍ پالیسۍ او وسلهوالو خدماتو د کمېټیو مهم غړی دی او د ریپبلکن د پالیسۍ د کمېټې مشري هم ور پغاړه ده. هغه د صدر ډونلډ ټرمپ نږدې کس بلل کېږي. اؤ اګست پلګر د ریپبلکن سټډي کمېټې مشر دی.
دواړو کانګرس غړو د فرورۍ په ۲۵ مه نېټه د مارکو روبیو په نوم لیک کې ویلي:
"موږ له تاسو غوښتنه کوو چې د پاکستان له پوځي رژیم سره خبرې وکړئ څو عمران خان خوشې شي."
جو ولسن دا لیک پر ایکس خپور کړی او لیکلي یې دي:
"زه او اګست پلګر د بهرنیو چارو پر وزیر مارکو روبیو غږ کوو چې په پاکستان کې دې جمهوریت بحال او عمران خان راخوشې کړل شي."
هغه ټینګار کړی چې د امریکا او پاکستان اړیکې یوازې هله قوي کېږي، چې بنیاد یې پر ازادۍ وي.
په لیک کې راغلي"عمران خان په پاکستان کې پراخه ملاتړ لري، او د هغه خوشې کېدل به د امریکا او پاکستان اړیکو ته نوی باب پرانیزي".
دواړو قانون سازانو زیاته کړې:"موږ پر تاسو غږ کوو چې د جمهوریت، بشري حقونو، د قانون حاکمیت، د رسنیو ازادۍ، د غونډو د ازادۍ، او د بیان د ازادۍ د ساتنې لپاره له پاکستان سره ګډ کار وکړئ"
په لیک کې دا هم ویل شوي چې د امریکا او پاکستان اړیکې د عمران خان پر ازادۍ پورې تړلې دي.
په ۱۷مه فرورۍ جو ولسن له مارکو روبیو سره تر لېدنې وروسته پر ایکس لیکلي وؤ:
"زه د بهرنیو چارو له وزیر مارکو روبیو سره د لیدو منندوی یم، هغه د نړۍ په کچه د ازادۍ او جمهوریت ارزښتونه درک کوي. زه په پاکستان کې د جمهوریت د بحالۍ لپاره له هغه سره کار ته سترګې په لار یم."
بلخوا، د استازو د ایوان د بهرني سیاست د کمېټې مشر براین ماسټ ویلي، که څه هم واشنګټن په پاکستان کې د جمهوریت وضعیت ته اندېښمن دی، خو د امریکا د بهرني سیاست مهم ټکي بیا هم ملي امنیت او اقتصادي ګټې دي.
د روانې میاشتې په پیل کې، جو ولسن د پاکستان ولسمشر آصف علي زرداري، وزیراعظم شهباز شریف، او د پوځ مشر جنرال عاصم منیر ته هم لیکونه استولی وو.
په دغو لیکونو کې ویل شوي وو"د پاکستان او امریکا قوي اړیکې د دواړو هېوادونو ملي ګټو ته مهمې دي."
په لیکونو کې ویل شوي وؤ "د امریکا او پاکستان دوه اړخیزې اړیکې تر ټولو باثباته هله وي، چې پاکستان د جمهوریت اصول او د قانون حاکمیت ته ژمن وي"
په خپل لیک او وینا کې، جو ولسن دا هم منلې چې له عمران خان سره ژور اختلافات لري، په ځانګړې توګه د روسیې ولسمشر ولادیمیر پوتین او د چین کمونېست ګوند په اړه د هغه کمزوري پالیسۍ ته په کتلو.خو، نوموړي ټینګار کړی:
"سیاسي مخالفین باید د انتخاباتو له لارې ماتې وخوري، نه دا چې پر سیاسي تورونو بندي کړل شي."
د پاکستان حکومتي چارواکي دریځ لري چې په عمران خان مقدمې عدالتونو کې روانې دي اؤ هغه باید عدالتونو کې ځان له تورونو سپین ثابت کړي.
Forum