د امریکا صدر جوبایډن ویلي امریکا به پاکستان سره افغانستان کې د امن دټينګښت، په کرونا وبا او ماحولياتي بدلون دقابو موندلو لپاره خپله همکاري دوامداره ساتي.
پاکستان مطبوعات وايي دا خبره د امریکا صدر جو بایډن د پاکستان دصدر ډاکټر عارف علوى په نوم د پاکستان دملي ورځې 23م ماچ په اړه لیږلي یو لیک کې کړې ده.
د امریکا صدر وايي چې د امریکا او پاکستان په ګډه کار کول د سيمه ايز امن او سوکالۍ په شريک مقصد ولاړ دي او د شريکو چېلنجونو مخې ته به خپل منځي همکارۍ ته دوام ورکوي.
له دې مخکې د امريکا ددفاع وزیر لايډ جی اسټن د پاکستان د پوځ مشر جنرال قمر جاوید باجوه سره هم په ټيليفون خبرې کړې دي .
د پېنټاګان لخوا جارى شوې اعلامیه کې ویل شوي چې لايېډ جی اسټن د افغانستان دامن بهير کې د پاکستان رول ستایلی او جنرال باجوه ته یې باور ورکړی چې امریکا به د پاکستان سره د شريکو ګټو په شعبو کې خپله همکاري جاري ساتي.
څېړونکي وايي د افغانستان د کشالې د هواري ترڅنګ داسې نورې برخې هم شته چېرته چې داوړه هېوادونه د خپل مينځي شريکو ګټو پر اساس ښې اړیکې جوړولی شي.
پاکستاني مطبوعات وايي چې د امریکا صدر جوباېډن د پاکستان صدر عارف علوي ته په ليکلي خط کې د پاکستان د ورځې په مناسبت پاکستاني اولس ته مبارکي ویلې ده.
په دغه خط کې جوبایډن وېلي، چې د پاکستان او امريکا ملګرتیا یا پارټنرشپ د سيمه یيز امن او سوکالۍ په شريک مقصد ولاړ دی او دا چې دواړه هېوادونه به د پېښو ګډو ننګونو لپاره خپل منځي همکاري روانه ساتى.
د امریکا صدر جوبایډن دپاکستان صدر ته دا خط په داسې وخت کې ليکلی چې امريکا د طالبانو او افغان حکومت ترمنځ د ودرېدلو بېن الافغاني مذاکراتو او د افغان کشالې په سوله یيز ډول د هواري لپاره خپلې سفارتي هلې ځلې په دې وروستیو کې ګړندۍ کړې دي.
ددې ترڅنګ د صدر جو باېډن انتظاميه تېر کال دفرورۍ مياشت کې دطالبانو او پخواني امریکایي صدر ډانلډ ټرمپ ترمنځ شوي د امن تړون ته بيا کتنه هم کوي.
په دغه لوظنامه کې د مئ مياشتې پورې له افغانستان څخه د امریکايي ځواکونو وتل هم شامل دي. خو واشنګټن وايي چې طالبانو د قطر په لوظنامه کې کړي لوظونه نه دي عملي کړي.
واشنګټن وايي طالبانو نه د القاعده او نړیوال ترهګرو سره اړیکې قطعه کړي او نه یې هم د افغانستان دننه په تشدد کې کمی راوستی دي.
پاکستان مطبوعات وايي له دې مخکې د امريکا د دفاع وزیر لايېډ جی اسټن د افغان امن عمل په لړ کې د پاکستان د کردار ستاېنه هم کړې ده.
دپاکستان د ډان ورځپاڼې رپورټ د پنټاګان د اعلامیې په بنسټ وايي چې د امریکا د دفاع وزیر لايېډ جی اسټن د تېر اتوار په ورځ د کابل د لا اعلانه سفر وروسته د پاکستان د پوځ سر لښکر جنرال قمر جاوید باجوه سره د ټيليفون د لارې خبرې اترې کړي دي.
د اعلامیې ترمخه په دغه خبرو کې نوموړي افغان امن بهير کې د پاکستان د پرله پسې ملاتړ مننه کړې ده او جنرال باجوه ته یې باور ورکړی چې امريکا به د پاکستان سره د شريکو ګټو په څانګو خپله همکاري دوامداره ساتي.
د دفاعي چارو کارپوهه دپوځ پخواني جنرال لیفټننټ جنرال ريټاېرډ طلعت مسعود وايي که څه هم د امریکا او هند ترمنځ نيزدې سټراټيجکي اړېکې دي خو ددې مطلب دا نه دی چې ګني اسلام اباد د واشنګټن سره ښې اړیکې نه شي لرلی.
وي اوی ای ډیوه سره خبرو کې هغه ویلي دواړه هیوادونه په افغانستان کې د امن د ټينګښت لپاره ګډې هلې ځلې کولی شي او بله داچې پاکستان یو سټراټيجکي ارزښت هم لري او که چېرې د امریکا او پاکستان اړیکې ښې وي نو ددې ګټه امریکا ته هم رسېدی شي.
هغه وايي پاکستان د دوه ويشت کروړه ابادۍ هیواد دی او لويه منډهي ده او که امریکا دلته پانګونې وکړي نو دواړه هیوادونه ترې ګټه پورته کولې شي.
د پېنټاګان دبیان ترمخه د دفاع وزیر جی اسټن د پاکستان سره د پياوړو خپل منځي دفاعى اړیکو د پرځائ ساتلو د امریکا عزم تکرار کړی دی او د افغان جګړې يو مسولانه انجام ته د رسولو په ضرورت یې ټينګار کړی دی.
خو هغه د افغانستان نه د امريکايي ځواکونو د وتلو لپاره کومه غوڅه نېټه نه ده ښودلې.
د افغان چارو څېړونکی او وتلی خبريال طاهر خان وايي د افغانستان په امن عمل کې د پاکستان د کردار ستاېنه امریکا او افغان حکومت هم کوی.
ډیوه سره خبرو کې هغه ویلي که د افغان حکومت او طالبانو ترمنځ سوله هم وشي خو بیا هم د پاکستان رول نه ختمېږي او د سولې په عملي کولو کې به واشنګټن ته د پاکستان د ملاتړ ضرورت وي.
د امریکا نوي صدر جوبایډن افغان کشالې د هواري لپاره خپل کوښښونه چټک کړي او د مارچ په شلمه ماسکو کې د ټراېکا په نامه د امريکا، روسیې، چین او پاکستان ترمنځ غونډه هم شوې وه.
په دغه غونډه کې که یو خوا د طالبانو د اسلامي امارت د راتلو سره مخالفت ښودل شوی نو ورسره د افغانستان د سولې د خبرو په چټکتیا، سياسي جوړ جاړي او د دايمي اور بند په پلي کېدو تينګار شوی.
په دې وروستیو کې د امریکا صدر جو باېډن ویلي وؤ چې د مئ د مياشتې پورې به د افغانستان نه د امريکايي ځواکونو ویستل ممکن وي خو ګران به وي او طالبانو په دغه بېان خپل غبرګون کې ګواښ کړی که امریکا د مئ میاشتې پورې خپل ځواکونه و نه ویستل نو پايلې به یې پخپله غاړه وي.
