د افغانستان سره په پوله پرته بر جنوبي وزیرستان ضلع کې د پوځ په قافله وسله وال بريد شوی، د وسله والو سره نښته کې شپږ پاکستاني پوځیان وژل شوي او د څلورو ترهګرو د وژل کېدو دعوه هم شوې ده. تحریک طالبان پاکستان د بريد زمه واري منلې ده.
امنيتي سرچينو وي او اې ډیوه ته ويلي، ياد برید نن سهار د بر جنوبي وزيرستان په تيارزه تحصيل کې شوی، د پوځ دوه ګاډي د معمول په ګزمه وو چې وسله والو پرې بريد کړی وو.
د علاقې پوليس وايي، بريد د تیارزه تحصيل په شېروانګۍ علاقه کې شوی دی.
پوځ د پېښې په اړه مطبوعاتو سره شریک کړي خبر کې نښته تاييد کړې او ويلي يې دي، وسله والو ته کلک ځواب ورکړل شوی دی.
پوځ په نښته کې د شپږو عسکرو او څلورو ترهګرو وژلو ويلي او زياته کړې یې ده، دوه ترهګر ژوبل شوي هم دي، خو د وژل شوو او ژوبلو ترهګرو نور تفصيل نه یې دی ویلی.
تحریک طالبان پاکستان مطبوعاتو سره په شريک کړي خبر کې پوځ ته د ګڼې مرګ ژوبلې اړولو دعوه کړې ده.
امنيتي سرچينې وايي، په نښته کې د پوځ اته نور عسکر هم سخت ژوبل شوي دي.
د سرچينو ترمخه د بريد وروسته نور امنيتي ځواکونه علاقې ته رسېدلي او پوځي هيليکاپټر هم سيمې ته د عملياتو دپاره رسېدلي دي. پوځ وايي په علاقه کې د ترهګرو د لټون او پاکۍ عملیات دوام لري.
په پوځ شوی ننی برید په جنوبي وزیرستان کې سږ کال په امنيتي ځواکونو تر ټولو غټ بريد ګڼل کيږي.
درې ورځې وړاندې د جنوبي وزيرستان سره په پوله پرتې ناارامه شمالي وزيرستان ضلعه کې په يوه چاودنه کې 11 مزدوران وژل شوي وو. د يادې چاودنې زمه واري چا نه وه منلې.
هغه وخت ويل شوي وو چاودنه په داسې مهال شوې چې پوځي ګاډی د چاودنې د ځای څخه تېر شوی او دپاسه پرې د مزدورانو ګاډی راغلی او چاودنه پرې شوې وه.
يادو مزدورانو په شمالي وزيرستان کې په امنيتي پوستو جوړولو کار کولو.
په کال 2009 کې د پاکستان پوځ په جنوبي وزيرستان کې د وسله والو ضد د راه نجات په نوم پوځي عمليات کړي او علاقه یې د وسله والو څخه پاکه ګرځولې او د سيمې نه کډوال شوي خلک بيرته ستانه کړی شوي وو.
خو په سيمه کې وخت په وخت د امنۍ پېښې کیږي، ځايي خلک د امنیت دپاره احتجاجونه کوي.
Forum