د خېبر پښتونخوا په سوات سیمه کې د غېرت په نوم د ښځو په وژنه کې زیاتوالی راغلی دی او د ښځو د حقونو لپاره د کارکوونکې ادارې د شمېرو له مخې سږ کال 31 ښځې په سوات کې د غېرت په نوم وژل شوې دي.
د سوات پولیس وایي د غېرت په نوم چې سږکال سوات کې کومې مېرمنې وژل شوي هغې کې دوي سره یوازې د اتو ښځو د وژنو مقدمې درج شوې دي.
سوات کې د ښځو د حقونو لپاره د کار کوونکې ادارې "اویکنګ" ډایریکټر وایي چې پروسږکال په سوات کې 16 ښځې د غېرت په نوم وژل شوې وې خو سږ کال 2023 کې دا شمېره 31 ته رسېدلې ده .
مدني فعال عرفان حسین بابک وي او ای ډیوه ته ویلي، د دوی تنظیم د وژل شوؤ ښځو کورنیو له ویړیا قانوني مرسته ورکړې ده.
خو د سوات پولیس وایي چې د هغوي د ریکارډ تر مخې سږکال اته ښځې د غېرت په نوم وژل شوي دي.
د سوات پولیسو د پلټنو د څانګې مشر یا اېس اېس پي انویسټي ګېشن بادشاه حضرت وایي، سږ کال زمونږ سره د غېرت د قتل ۸ مقدمات رجسټرډ شوي دي چې پکې ککړ ۱۴ ملزمان ګرفتار دي او یو ملزم پټ دی.
د غېرت په نوم په سوات کې د تعلیم د محکمې د یوې وژل شوې افسرې خور ویلي هغوي ته تر اوسه انصاف نه دی ورکړل شوی .
د تعلیم محکمې د وژل شوې افسرې خور امنه بي بي ( فرضي نوم) وایي،زما خور خاوند په دې وژلې وه چې زما خور به ورله خپله تنخا نۀ ورکوله.
وي او اې ډیوه سره خبرو کې هغې وویل د خور د وینو سره یې تر اوسه انصاف نه دی شوی اؤ زیاته یې کړه "مونږ د حکومت نه انصاف غواړو".
قانون پوهه عطاءاللّٰه جان ایډوکېټ وي او ای ډیوه سره خبرو کې وایي چې د غېرت په نوم د ښځو د وژلو زیاتې مقدمې د هغوي د کورنیو د غړو په مدعیت کې د پولیس سره درج کیږي چې بیا پکې هغوي روغه وکړي او د عدالت نه په وژنو کې ککړ کسان بري شي.
عطاء الله جان وایي، کۀ چرې د غېرت په نوم د وژنې مقدمه د ریاست په مدعیت کې درج شي او دې کې دفعه ۳۱۱ ولګولی شي نو دې کې بیا روغه نۀ شي کېدای او ملزم ته د سزا ورکړی کیدو زیات امکان وي.
د تېر کال اکتوبر په مياشت کې د پاکستان د بشري حقونو مرکزي وزارت ويلي وو، په تېرو دریوؤ کلونو کې په ملک کې په ښځو د تشدد د 63000 څخه زياتې مقدمې درج کړی شوې وې او په دغه موده کې نزدې 1025 ښځې د غېرت په نامه وژلې شوې وې.
د بشري حقونو مرکزي وزارت قامي اسمبلۍ کې د ښځو پرضد د کورني، جنسي تشدد او د ښځو د وژنو په اړه معلوماتو کې ويلي وو چې په تېرو درو کلونو کې3987 ښځې وژل شوي او په ياده موده کې نزدې10500 ښځو باندې جنسي تیری شوی وو.
Forum