د بلوچستان په بلوڅ ميشته سيمه خضدار کې نن د جمعې د لمانځه وروسته بمي چاودنه شوې چې د پوليس چارواکو په وينا دې چاودنه کې د خضدار وتلی خبريال او د خضدار پريس کلب صدر محمد صديق مېنګل وژل شوي او نهه تنه نور ټپيان شوي دي.
له ډيوه سره د ټيلي فون له لارې په خبرو کې د خضدار پوليس تاڼې د پوليس يوه چارواکي وويل د بريد هدف خبريال محمد صديق مېنګل ؤ.
هغه وایي " پېښه د خضدار ښار چمروک سيمه کې شوې، محمد صديق پکې وژل شوی، له هغه سره د هغه په موټر کې سواره درې ملګري د محمد صديق په موټر پورې چسپکي ماين لګول شوی او هغه چاویدلی، د پېښې نور تفصيل را ټولوو"
د خضدار پريس کلب جنرل سېکرېټري محمد اقبال له ډيوه سره په خبرو کې وایي،
د خضدار خبريالان له هرې خوا د مرګ په خوله کې دي.
هغه وایي"رياست موږ ته يو ډول تحفظ نه دی راکړی، و محمد صديق ته له اوله هم دهمکۍ ورکول شوې او پر هغه بريد هم شوی، موږ هر وخت له حکومت څخه د هغه د خونديتوب لپاره د ګامونه اخستو غوښتنه کړې ده خو حکومت کله هم زموږ غوښتنه ونه منله او نن يې نتيجه دا شوه"۔
د محمد اقبال په خبره په تيرو څو کلونو کې په خضدار کې اته نور خبريالان وژل شوي چې پکې درې د پريس کلب مشران يا صدران وو۔
په سمدستي توګه ددې پېښې ذمه واري چا پغاړه نه ده اخستې.
د بلوچستان د خبريالانو تنظيم بي يو جی ياده پېښه په کلکو ټکو غندلې او د پېښې پر ضد يې د کوټې پريس کلب و مخې ته نن د جمعې په ماذيګر د احتجاج کولو اعلان کړی.
د تنظيم له لوري په خپاره شوي بيان کې ویل شوي،" د خبريالۍ نړيواله ورځ باندې د محمد صديق وژنه د حکومت د بې حسۍ او ناکامۍ ثبوت دی، د مشر خبريال وژنه د حکومت د خلکو د خونديتوب د دعوو نفي کوي"
تنظيم ويلي که حکومت په پيښه کې ککړ عناصر ژر تر ژره ونه نيسي نو په ټول ملک کې به سخت احتجاج کوي.
د بلوچستان حکومت د پېښې غندنه کړې او د ملزمانو د ژر تر ژره نيولو امر يې کړی.
په سرکاري جاري شوي بيان کې د خضدار له ضلعي انتظاميې څخه د پېښې رپورټ غوښتل شوی.
د بلوچستان جميعت علما اسلام ف صوبايي صدر سینیټر مولانا عبدالواسع د دې بمي چاودنې غندنه کړې اؤ پخپل یو بیان کې یې ویلي محمد صديق يو وتلی خبريال او د جمعيت ګوند يو ښه کارکن وو، د هغه په وژنه کې ککړ کسان دې ژر تر ژره ونيول شي.
د کال 2023م په يوولسم اګست هم پر محمد صديق مېنګل په خضدار بازار کې مرګونی وسلوال بريد شوی و چې هغه پکې ژوندی وتلی و خو موټر یې پکې زيان من شوی و.
ډيوه سره پخپل ژوند پخپله یوه وروستۍ مرکه کې هغه د صدیق مینګل د ځان د وژل کېدو ویره ښودلې وه اؤ د حکومت په بې غورۍ یې کلکې نیوکې کړې وې.
هغه وخت د کوټې د پريس کلب ومخې ته په احتجاج کې محمد صديق په خپله شريک وو او ډيوه سره په خبرو کې یې ویلي وؤ،
" پر ما قاتلانه حمله وشوه زه بچ شوم، حکومت زموږ د خونديتوب په باب کوم ګامونه نه دي اخيستي، تاسو خبر ياست چې خضدار د صحافيانو لپاره تر ټولو خطرناکه سيمه ده".
Forum