د امریکې د بهرنیو چارو وزیر، مایک پامپیو، نن په یو ناڅاپي سفر کابل ته ولاړ او هلته یې له افغان ولسمشر محمد اشرف غني سره وکتل. په دې کتنه کې د افغانستان له لوري، اجرایيه رئیس عبدالله عبدالله او یو شمیر نور چارواکي هم حاضر وو.
د ولسمشر غني دفتر ویلي چې په دې لیدنه کې، دواړو غاړو د جنوبي ایشیا لپاره د صدر ټرمپ پر سټراټیجۍ په جزییاتو وغږېدل او دواړو توافق وښود چې دغه سټراټیجي په حقیقت کې موثره او اغیزمنه روانه ده.
د افغانستان د ولسمشرۍ ماڼۍ یا ارگ ویلي چې افغان صدر او د امریکې د بهرنیو چارو وزیر همدا شان د سولې پر بهیر چې د افغانو په مشرۍ وي، او د بریالي ډزبندۍ په هکله هم سره وغږیدل.
د امریکا د بهرنیو چارو وزیر مایک پامپیو، له صدر غني سره په لیدنه کې وویل: «ډیری طالبان په دې ټکي پوهیدلي دي چې له پوځي لارې نشي کولای بریالي شي.» ښاغلي پامپیو زیاته کړله چې دا خبره تر ډیره حده، د صدر ټرمپ په سټراټیجۍ او د صدر غني لخوا د ډزبندې په اعلانېدو پورې مربوط کیږي.
پامپیو ژمنه وکړه چې امریکا به په بیلابیلو برخو کې، په ځانگړي توگه د سولې په بهیر، او د افغان امنیتي او دفاعي ځواکونو په سمبالولو کې، د افغانستان ملاتړ ته ادامه ورکړي.
د ارگ د خبرپاڼې له مخې، د دواړو چارواکو ترمنځ د خبرو بله موضوع، د راتلونکو پارلیماني انتخاباتو لپاره د امنیتي انتظاماتو جزییات وو. ویل کیږي چې پر رڼو او عادلانه انتخاباتو هم ټینگار وشو.
د امریکې د بهرنیو چارو د وزیر په توگه، دا افغانستان ته د مایک پامپیو لومړنی سفر و.
