دپاکستان دحکومت او د نړیوالې مالياتي ادارې ايي ایم ایف ترمينځ د ځنډ ښکار د قرض پروګرام د بيا پرځائ کولو لپاره خبرې روانې دي او د پاکستان حکومت هېله لري چې ايي ایم ایف به پاکستان ته د 90 کروړه ډالرو قسط زر جاري کړي.
د نړیوالې مالياتي ادارې اي ایم ایف چارواکو منلې ده چې د پاکستان سره د راتلونکي مالي کال 2022م اؤ 23م په بجټ مهم پرمختګ شوی خو وايي دا خبرې دې پړاو ته نه دي رسيدلي چې پاکستان ته د 90 کروړه ډالرو قسط جارى کړی شي.
د پاکستان او ايي ایم ایف ترمنځ د شپږو اربو ډالرو دقرض دپروګرام د بحالۍ خبرونه په داسې حال کې خپاره شوي چې هېواد دا وخت د سختو اقتصادي ستونزو سره مخ دی او د بهر ملکي زر مبادلې ذخیرې هم په چټکتیا سره غورځېږي.
وي او اې اردو څانګې ته دنړیوالې مالياتي ادارې ايي ایم ایف يو چارواکي وېلي چې د پاکستاني چارواکو او ايي ایم ایف ترمنځ د اقتصادي ثبات په تګلاره خبرې روانې دي او زياته کړې یې ده چې د خبرو په مهال د راتلونکي مالي کال 2022م 23م په بجټ هم مهم پرمختګ شوی دی.
البته د ايي ایم ایف چارواکي واضحه کړې چې د پاکستان او ايي ایم ایف روانې خبرې دې پړاو ته لا نه دي رسېدلي چې پاکستان لپاره د 90 کروړه ډالرو قسط جاري کړی شي.
د پاکستان په ځايي مطبوعاتو کې داسې خبرونه خپاره شوي چې د پاکستاني چارواکو او ايي ایم ایف ترمنځ د قرض پروګرام د بحالۍ او د قسط جاري کولو په موخه روانې خبرې کامیابې شوي دي.
د پاکستان په اقتصادي وضعیت او د نړیوالې مالياتي ادارې ايي ایم ایف سره په روانو خبرو نظر لرونکي خبريال مهتاب حېدر ډيوه سره په دې اړه خبرو کې ويلي چې د ايي ایم ایف سره په بجټ لوظنامه شوې او د مامورینو په کچه تړون لا نه دی شوی.
نوموړي وويل د پاکستاني چارواکو او ايي ایم ایف ترمنځ د مذاکراتو په مهال پاکستان موافقه کړې چې هغه به خپل مالياتي ځاندرې ته بيا کتنه کوي او مخکې وايي ايي ایم ایف د محصولاتو د مرکزي بورډ ایف بي ار لپاره د محصولاتو هدف هم زيات کړی دی.
نوموړی وايي د پاکستان د مرکزي بنک سره په ځینو معاملو خبرې پاتې دي او چې څنګه دا خبرې پائ ته ورسىږي نو بیا به لوظنامه کېږي چې په راتلونکې هفته کې یې د لاسلیک کيدو امکان دی.
هغه وايي ايي ایم ایف د پاکستان لپاره د پټرولیم لېوي هدف د 750 اربو روپو څخه 550 اربو روپو ته راکم کړی او د جولایي د مياشتې د اولنۍ نېټې نه به د يو لېټر په سر د تېلو په نرخ کې 30 روپۍ اضافه پېل کېږي او دا اضافه به په مرحله وار ډول کېږي.
پاکستان دا وخت د سختو اقتصادي ستونزو سره مخ دی، د بهر ملکي زر مبادلې ذخیرې یې په تېزۍ سره کمېږي او مرکزي بانک وايي د زر مبادلې مجموعي حجم 15 ارب ډالرو ته لاندې راغلی، هم دا شان د درامداتو حجم هم 70 ارب ډالرو ته رسېدلې دی.
د مسلم لیګ نواز ګوند په مشرۍ د اتحادي حکومت د جوړېدو راپدېخوا د ډالر په مقابله کې کې د روپۍ په ارزښت کې 25 روپۍ اضافه راغلې ده.
د پاکستان د خزانې وزیر مفتاح اسماعیل د نړیوالې خبري اېجنسۍ روېټرز سره خبرو کې وېلي چې د ايي ایم ایف سره په بنيادي توګه په بجټ او مالياتي ګامونو اتفاق شوی دی.
هغه وبلي چې پاکستان د ايي ایم ایف څخه د پورې دمودې غځولو او په دې رقم کې دلا پراختیا هيله لري.
په عېن حال کې دپاکستان تحریک انصاف ګوند په تېر حکومت کې د خزانې وزیر شوکت ترین د شورو په ورځ اسلام اباد کې د مطبوعاتو سره خبرو کې د پاکستان حکومت او ايي ایم ایف ترمنځ د قرض پروګرام د بحالۍ په شرطونو ټکونه کړي او وایي دې سره به دګرانۍ طوفان راشي او د ګرانۍ کچه به 40 فيصدي ته ورسي.
د اقتصادي چارو کارپوهان د پاکستان اوسني اقتصادي حالت ته په کتو وايي باید چې د پاکستان لپاره د ايي ایم ایف پروګرام زر تر زره بحال شي او مهتاب حيدر وايي پاکستان سره د ایي ایم ایف د لوظنامې پرته بله لاره نشته ولې چې د بهر ملکي زر مبادلې ذخایر په تېزۍ سره کمېږي.
خو د اقتصادي چارو کارپوهه ډاکټر اشفاق حسن خان د ايي ایم ایف سره د قرض په پرورګرام ټکونه کوي.
ډيوه سره خبرو کې نوموړي وويل کوم هېواد چې هم د قرض لپاره د ایي ایم ایف په پروګرام کې يو ځل شامل شوی نو هغه بيا له دې چرته بېرته نه دی راوتلی.
هغه وايي د وېنزوېله مثال په وړاندې دی او هلته د ايي ایم ایف د تګلارو له کبله اوس کميونسټ رژيم په واک کې راغلی او جمهوریت ختم شوی.
دی وايي چې په ولس کله زيات پېټی واچول شي نو هغوي بيا د نظام نه بغاوت کوي او پکار ده چې د پاکستان حکومت د ايي ایم ایف پروګرام په داسې ډول لاګو نه کړي چې دلته جمهوریت ختم او آمرانه نظام ته لاره هواره شي.
مطبوعاتي رپورټونه وايي چې د پاکستاني چارواکو او ايي اېم اېف ترمنځ خبرو کې د راتلونکي مالي کال بجټ کې د ټېکسونو هدف د 7 زره، 5 اربو روپو څخه 7 زره، 450 اربو روپو ته په رسولو اتفاق شوی او دمالیې د وصولیو هدف د 950 ارب روپو نه 1 زر، 5 ارب روپو ته په رسولو سلا راغلې ده.
اخوا پاکستان ته د يورپي اتحادیې لخوا د ورکړی شوي جي ایس پي پلس د اسانې غځولو او د پاکستان لخوا په 27 کنونشنز د عمل درامد دجاج اخستو لپاره د يورپي يونين يو څارندویه مشن هم اسلام اباد ته راغلی دی.
مطبوعاتي رپورټونه وايي دا مشن به د بشري حقونو، د ماشومانو د مشقت د ختمولو ترڅنګ د مزدورانو د حقونو د صورتحال جاج اخلي.
